तमानखोला गाउँपालिका– १, बिसोक, बागलुङमा श्रीमतीले धकेलेर ठोकिँदा चोट लागेर श्रीमानको मृत्यु भएको छ । सामान्य घरायसी विवादमा उनीहरुबीच कुटाकुट नै भएको स्थानीयवासीले बताएका छन् । श्रीमती भने गम्भीर घाइते भएकी छन् ।
घरायासी विवादका क्रममा ६४ वर्षीय रविलाल विकले ६० वर्षीया श्रीमती जमुना विकलाई माघ १६ म कुटेका थिए । कुटपिटको क्रममा श्रीमती जमुना विकले धकेल्दा टाउँकामा चोट लागेर रविलाल घाइते भएको प्रहरीले जनाएको छ । टाउकामा गम्भीर चोट लागेका विकको घटनास्थलमै मृत्यु भएको जिल्ला प्रहरी कार्यालयले जनाएको छ ।
श्रीमान् श्रीमतीबीच सधैंजसो सामान्य विषयमा पनि भनाभन हुने गरेको र बिहीबार रविलालले कुटपिट गरेपछि जमुनाले धकेल्दा घरको भित्तामा ठोक्किएर मृत्यु भएको भन्दै स्थानीयवासीले शुक्रबार बिहान प्रहरी चौकी बोङगादोभानमा खबर गरेका थिए । मृत्यु भएका रविलालको शव परीक्षणका लागि बुर्तिवाङ स्वास्थ्य चौकीमा राखिएको छ ।
घाइते जमुनालाई उपचारका लागि धौलागिरि अञ्चल अस्पताल बागलुङमा ल्याइएको इलाका प्रहरी कार्यालय बुर्तिवाङका प्रहरी निरीक्षक सुरज खड्काले बताएको खबर राससले प्रेषित गरेको छ ।
