दोस्रो पटक मिर्गौला प्रत्यारोपण गरेका प्रधानमन्त्री केपी शर्मा ओलीलाई मिर्गौला दिने ‘भान्जी’ समीक्षा संग्रौला ज्ञवालीले मिर्गौला प्रत्यारोपणपछि ‘पहिलो भिजिटर’ का रुपमा प्रधानमन्त्री केपी शर्मा ओलीलाई भेटेर अस्पतालबाट डिस्चार्ज भएकी छन् ।
शल्यक्रियापछि चिकित्सक बाहेक श्रीमती समेतलाई भेट्न नपाएका प्रधानमन्त्री ओली र समीक्षाबीच करिव २ मिनेट कुराकानी भएको थियो । नाताले ‘मामा’ पर्ने ओलीलाई भेटेर संग्रौलाले स्वास्थ्य अवस्थाबारे जानकारी लिइन् । भेट्नासाथ उनले सोधिन्– ‘मामा तपाईंलाई कस्तो छ ?’
समीक्षाको प्रश्नपछि प्रधानमन्त्री ओली बोले– ‘मलाई त ठीकै छ, तिमीलाई कस्तो छ नि ?’ कृतज्ञतापूर्वक प्रधानमन्त्रीले भने– ‘तिमीलाई धेरै–धेरै धन्यवाद छ, आफ्नो ख्याल गर्नू, स्वास्थ्यमा राम्राे ध्यान दिनू ।’
गत बुधबार त्रिवि शिक्षण अस्पताल महाराजगञ्जमा प्रधानमन्त्री ओलीको मिर्गौला प्रत्यारोपण गरिएका थियो । प्रधानमन्त्री ओलीको स्वास्थ्य सुधारोन्मूख भएको उल्लेख गर्दै केही दिनमा डिस्चार्ज गरिने अस्पतालले जनाउँदै आएको छ ।
