नेपालमा कोभिड– १९ को सङ्क्रमण देखिएको भन्दै भ्रामक श्रब्य सामग्री (अडियो) बनाएर सामाजिक सञ्जालमा ‘पोस्ट’ गरेको आरोपमा एक युवकलाई प्रहरीले पक्राउ गरेको छ ।
रामेछाप घर भई भक्तपुरको सिपाडोल बस्ने विवेक थापा मगरलाई शनिबार पक्राउ गरिएको प्रहरी प्रवक्ता प्रहरी नायव महानिरीक्षक शैलेश थापा क्षेत्रीले जानकारी दिए । साइबर अपराधसँगै सार्वजनिक शान्ति सुरक्षा विरुद्धको कसुरमा थापा मगरमाथि प्रहरीको साइबर ब्युरोले अनुसन्धान गरिरहेको जानकारी उनले दिए ।
मगरले विनादर्ता ‘झोर्ले न्युज डट कम’ नामक अनलाइन सञ्चालन गरिरहेको बताइएको छ । नेपालमा कोरोनाको सङ्क्रमण देखिएको र केहीको मृत्यु समेत भएको भनी उनले भ्रामक श्रब्य सामग्री (अडियो) रेकर्ड गरेर सामाजिक सञ्जालमा राखेका थिए । एक व्यक्तिलाई सम्बोधन गरेर रेकर्ड गरिएको उक्त अडियो एक मिनेटको छ ।
अडियोमा नर्भिक अस्पतालका कर्मचारीले दिएको जानकारी भनेर उल्लेख गरिएको छ । उक्त अडियोका विषयमा सामाजिक सञ्जालमा व्यापक आलोचना हुनुका साथै जनमानसमा भ्रम सिर्जना भएको प्रहरीको भनाइ छ । गलत हल्लाका पछि नलागी सरकारको आधिकारिक सूचना र जानकारीबारे ख्याल गर्न समेत प्रहरीले आग्रह गरेको छ ।
गलत सूचना सार्वजनिक गर्नेलाई कारबाही गर्ने सरकारले जनाइसकेको छ । नर्भिक इन्टरनेसनल अस्पतालले समेत कोभिड– १९ का बिरामी फेला नपरेको स्पष्ट पारिसकेको खबर राससले प्रेषित गरेको छ ।
