कोरोनाभाइरसबाट प्रभावित वा शङ्कास्पद व्यक्ति देखिए वा बिरामी भएको खबर प्राप्त भए तत्काल उद्धार गरी अस्पताल पुर्याउन गृह मन्त्रालयले गृहमन्त्री थापाकै संयोजकत्वमा ‘प्यासेन्ट रिसिभिङ टिम’ गठन गरी काम सुरु गरेको छ ।
कोरोनाभाइरस रोकथामको प्रभावकारी उपाय अपनाउन र तत्कालै समस्या सम्बोधन गर्न मन्त्रालयको राष्ट्रिय आपतकालीन कार्यसञ्चालन केन्द्रमा सबै सुरक्षा निकाय र स्वास्थ्य तथा जनसङ्ख्या मन्त्रालयका प्रतिनिधि रहेको ‘ज्वाइन्ट अपरेसन सेन्टर’ समेत स्थापना गरिएको मन्त्रालयले जनाएको छ । उक्त कार्यमा सहयोग गर्न र शङ्कास्पद बिरामी देखिएमा तुरुन्त खबर गर्न तथा कालोबजारीको सूचनाबारे तत्कालै स्थानीय प्रशासनलाई जानकारी गराउन समेत सरकारले सबैमा आग्रह गरेको छ ।
थप अनुराेध र चेतावनी
मन्त्रालयले सिट क्षमताभन्दा बढी यात्रु नचढाउन र भीडभाड नगरी यात्रा गर्न पनि यातायात व्यवसायी र यात्रुलाई अनुरोध गरेको छ । यात्रुबाहक सार्वजनिक सवारी धनीले सवारीलाई ‘डिस इन्फेक्सन’ गराउन समेत मन्त्रालयका प्रवक्ता केदारनाथ शर्माद्वारा जारी विज्ञप्तिमा अनुरोध गरिएको छ । उपभोग्य सामग्रीको कृत्रिम अभाव सिर्जना गर्ने, जम्माखोरी तथा कालोबजारी गर्ने एवं मिसावट गर्ने–गराउनेलाई कानुनअनुसार कडा कारबाही गरिने चेतावनी समेत सोही विज्ञप्तिमार्फत दिइएको छ । दैनिक उपभोग्य वस्तु पर्याप्त मात्रामा रहेकाले आफूलाई आवश्यक पर्ने परिमाणमा मात्रै खरिद गर्न भनिएको छ । विज्ञप्तिमा चैत मसान्तसम्म तालिम, सेमिनार, गोष्ठी, सभा, सम्मेलन बन्द गर्न पनि भनिएको छ ।
मन्त्रालयले आइतबार साँझ विज्ञप्तिमार्फत १९ बुँदे निर्णय सार्वजनिक गर्दै कोरोनाभाइरसको सम्भावित जोखिमबाट बच्ने कार्यमा हातेमालो गर्न अनुरोध समेत गरेको छ । कोरोनाभाइरसको सम्भावित सङ्क्रमण हुन नदिन सिनेमा हल, सांस्कृतिक केन्द्र, रङ्गशाला, खेलमैदान, जिम, हेल्थ क्लब, म्युजियम, स्वीमिङ पुल, मनोरञ्जनस्थल, डान्सबार तथा क्लबलाई चैत मसान्तसम्म बन्द गर्न भनिएको छ ।
अत्यावश्यकबाहेक आवतजावत एवं हिँडडुल नगर्न अनुरोध गर्दै सरकारले सामाजिक, सांस्कृतिक र त्यस्तै कार्य मठमन्दिर, गुम्बा, मस्जिद, चर्च र पार्टी प्यालेसजस्ता सार्वजनिकस्थलमा २५ जनाभन्दा बढी मानिस भेला नहुन पनि दोहोर्याएको छ ।
अरू यस्ता व्यवस्था
ज्वरो मापन गर्ने उपकरणको व्यवस्था गरी व्यक्तिको स्वास्थ्य जाँच गरेर मात्र प्रवेश गराउने व्यवस्था मिलाउन सरकारले होटल, मोटेल, रिसोर्ट, लज, रेष्टुराँ, बार, सपिङ मलका सञ्चालकलाई आग्रह गरेको छ । सीमानाकाबाट आवागमन गर्ने यात्रुको स्वास्थ्य सुरक्षालाई प्राथमिकतामा राखी सङ्क्रमणबाट जोगाउन अनिवार्यरुपमा स्वास्थ्य जाँचको व्यवस्था र सुरक्षामा सरकारले कडाइ गरेको छ । अत्यावश्यक कामबाहेक नाकामा नजान समेत सरकारले भनेको छ ।
सरकारले देशैभरिका अत्यावश्यक बाहेकका सेवा बन्द गरिए पनि सबै सरकारी संस्था–कार्यालय खुला रहेकाले कर्मचारीलाई बिदा नबस्न आग्रह गरेको गृहमन्त्रालयले जनाएको छ । सरकारको उक्त निर्णय कार्यान्वयन भए–नभएको बारेमा अनुगमन गरी कारबाही गर्न प्रहरी प्रशासनलाई निर्देशन समेत दिइएको खबर राससले प्रेषित गरेको छ ।
