सत्तारूढ नेपाल कम्युनिस्ट पार्टी (नेकपा) भित्रको विवाद पेचिलो बन्दै पार्टी नै विभाजनतर्फ गइरहेका बेला उपाध्यक्ष वामदेव गौतमले ‘पार्टी जोगाउन’ भन्दै ६ बुँदे प्रस्ताव अघि सारेका छन् । विगतमा पार्टी फुटको पीडा राम्रैसँग व्यहोरेका उपाध्यक्ष गौतमले फेरि त्यस्तो स्थिति आउन नदिन र पार्टीलाई मजबुत बनाउन भन्दै यस्तो प्रस्ताव अघि सारेका हुन् ।
गौतमले ल्याएको सो प्रस्तावलाई नेकपाका शुभेच्छुकहरूले पार्टी जोगाउने ‘सुपरग्लु’ का रूपमा लिएका छन् । सो प्रस्तावले पार्टीलाई टुटफुटबाट जोगाउने भन्दै कार्यान्वयनमा ल्याउनुपर्ने आम कार्यकर्ताको माग छ । गौतमले प्रधानमन्त्री एवं अध्यक्ष खड्ग ओली र अर्का अध्यक्ष पुष्पकमल दाहाललाई मंगलबार सो प्रस्ताव बुझाएका छन् ।
शीर्ष नेताहरूको अडानका कारण पार्टी फुटको संघारमा पुगेका बेला गौतमको प्रस्तावलाई धेरैले सकारात्मकरूपमा लिइएका छन् । गौतमको प्रस्तावमा देशभरका अधिकांश नेता तथा कार्यकर्ताहरूले समर्थन जनाएका छन् । गौतमले प्रस्तावको सुरुकै बुँदामा केपी ओली एकता महाधिवेशनसम्म अध्यक्ष र प्रतिनिधिसभाको वर्तमान कार्यकालको बाँकी अवधिभर प्रधानमन्त्रीको जिम्मेवारीमा रहनुपर्ने उल्लेख गरेका छन् भने दोस्रो बुँदामा अध्यक्ष दाहाल एकता महाधिवेशनसम्म सम्पूर्ण कार्यकारी अधिकारसहित अध्यक्षको जिम्मेवारीमा रहने तथा पार्टीको एकता महाधिवेशन सहमतिमा आयोजना गर्ने प्रस्ताव गरेका छन् ।
प्रधानमन्त्रीका दैनन्दिनका कामहरूमा पार्टीले हस्तक्षेप नगर्ने तर सरकारले राष्ट्रिय तथा अन्तर्राष्ट्रिय महत्त्वका विषयहरूमा निर्णय गर्नुपूर्व पार्टीको सचिवालयमा परामर्श गरेर मात्रै गर्नुपर्ने प्रस्ताव गौतमले गरेका छन् । यसैगरी, प्रशासन तथा सुरक्षा निकायका कर्मचारीहरूको पदोन्नति र सरुवाका लागि मापदण्ड निश्चित गरी कार्यान्वयन गर्नुपर्ने गौतमको प्रस्ताव छ ।
यस्तै, पार्टी केन्द्रीय सचिवालयको सुझाव र परामर्शमा मन्त्रिपरिषद पुनर्गठन तथा राजनीतिक एवं संवैधानिक नियुक्ति गर्नुपर्ने गौतमको प्रस्ताव छ । संसदमा नीति तथा कार्यक्रम र बजेट प्रस्तुत गर्नुपूर्व सचिवालयको परामर्श लिनुपर्ने सुझाव पनि उनको प्रस्तावमा छ । पार्टीका बैठकहरू पार्टी कार्यालयमा आयोजना गर्नुपर्ने समेत गौतमले प्रस्ताव गरेको खबर बुधबारको राजधानी दैनिकमा प्रकाशित छ ।
यस्ताे छ गाैतमले अध्यक्षद्वयलाई बुझाएकाे सहमतिकाे प्रस्ताव–
