राजधानी काठमाडौंस्थित टोखा नगरपालिका– १०, गोंगबु, नवज्योति मार्गमा शनिबार राति भएको वीभत्स हत्याकी आरोपीलाई सोमबार पक्राउ गरी प्रहरीले मंगलबार सार्वजनिक गरेको छ ।
रोल्पाका कृष्णबहादुर बोहराको सो हत्याको आरोपमा कल्पना मुडभरी (पौडेल) लाई प्रहरीले चितवनमा पक्राउ गरी काठमाडौं ल्याएर पत्रकार सम्मेलनमार्फत सार्वजनिक गरेको हो । राजधानीमा बोहोराको हत्या गरेर चितवन पुगेकी भनिएकी कल्पना कलाकार समेत रहेको प्रहरीले जनाएको छ । उनले केही चलचित्रमा अभिनय गरेको प्रहरीले जनाएको छ ।
सो हत्याकाण्डमा संलग्नताको आशंकामा प्रहरीले १० कक्षामा अध्ययनरत उनकी छोरीलाई समेत चितवनबाटै पक्राउ गरेको छ । बोहोराको हत्यापछि शव व्यवस्थापनमा उनकी छोरी संलग्न रहेको प्रहरीको भनाइ छ । ८ महिनादेखि होटलमा बस्दै आएका बोहोरा र कल्पनाबीच फेसबुकमार्फत चिनजान भएर निकटता बढेको प्रहरीको भनाइ छ ।
