कमरेड अध्यक्ष केपी शर्मा ओली,
नेपाल कम्युनिष्ट पार्टी (नेकपा)
विषयः केन्द्रीय सचिवालयको बैठक बोलाउने बारे ।
पार्टीमा उत्पन्न अन्तरविरोध र मतभेदको समाधान गर्दै एकतावद्ध भई देश र जनताप्रतिको दायित्व पूरा गर्ने उद्देश्यले कार्यदल गठन गरी त्यसको प्रतिवेदनका आधारमा गत भाद्र २६ गते स्थायी कमिटीको बैठकले महत्वपूर्ण निर्णय गरेको थियो । उक्त निर्णय, कोरोना विषाणुको बढ्दो संक्रमणबाट उत्पन्न विषम परिस्थिति, पार्टीको वृहत्तर हित एवं एकता, राष्ट्रिय महाधिवेशनको तयारीलगायत पार्टी जीवनलाई गति प्रदान गर्ने तथा राष्ट्रियता र जनजीविकासँग सम्बन्धित कतिपय ज्वलन्त समस्याहरुको समाधानमा सरकारका काम–कार्वाही प्रभावकारी तुल्याउनेसमेत उद्देश्यका साथ गरिएको तथ्य स्पष्टै छ । स्थायी कमिटीको बैठकका निर्णयहरुलाई अध्यक्षद्वयको हस्ताक्षरबाट पार्टीमा निर्देशनको रुपमा प्रेषित गरिएबाट पार्टीपंक्तिमा उत्साह जागेको थियो । पार्टी र सरकारका सबै कामहरु उक्त निर्देशनअनुरुप गतिका साथ कार्यान्वयन हुनेछन् भन्ने अपेक्षा गरिएको थियो । तर, व्यवहारमा त्यस्तो हुन सकेन । यो स्थितिको निम्ति प्रधानमन्त्रीसमेत रहनुभएका अध्यक्ष क.केपी शर्मा ओली नै जिम्मेवार हुनुहुन्छ । तपाईले पार्टी एकतालाई रक्षा गर्दै पार्टी र सरकारलाई विचार, नीति तथा विधि, पद्दतिका आधारमा सञ्चालन गर्ने मर्मका साथ लिइएको पार्टी निर्णयको कार्यान्वयनमा तत्परता प्रदर्शन गर्नुको सट्टा त्यसको अवज्ञा गर्नुभयो । यसले पार्टीमा पुनःसंकट उत्पन्न गरेको छ र आम पार्टी पंक्तिमा गम्भीर चिन्ता छाएको छ ।
यसबीचमा कोभिड–१९ को संक्रमणको विस्तारको तीब्रताको कारणबाट नागरिकको स्वास्थ्य र जनजीवीकाको क्षेत्रमा थप संकट देखिएकाले त्यसलाई सम्बोधन गर्न तत्काल ठोस कदम चाल्नसमेत जरुरी हुुन गएको छ । यस अतिरिक्त कर्णाली प्रदेशमा देखिएको आन्तरिक विवाद, पर्सामा पार्टीभित्रैको आक्रमणबाट भएको कार्यकर्ताको हत्या, भारतको जासुसी संस्था ‘र’ प्रमुखको नेपाल भ्रमणलगायतका महत्वपूर्ण तथा संवेदनशील विषयहरुमा छलफल, स्पष्टता र समाधानको आवश्यकता देखिएको छ । यी सबै विषयहरुमा छलफलका लागि छिटो सचिवालयको बैठक राख्न सचिवालयका विभिन्न कमरेडहरुले लिखित, मौखिक अनुरोध गर्नुभयो । यस स्थितिमा समग्र पक्षहरुमाथि ध्यान दिँदै कार्यकारी अध्यक्ष क.पुष्पकमल दाहाल “प्रचण्ड”ले तपाईसँग पार्टी निर्णय कार्यान्वयनको समीक्षा गर्न, कोभिड–१९ बाट उत्पन्न संवेदनशील स्वास्थ्य तथा आर्थिक संकट समाधान गर्ने कदम चाल्न, पार्टीमा देखापरेको समस्या र संकटको निवारण गर्न, पार्टी एकताको रक्षा गर्दै पार्टी जीवनलाई स्वाभाविक गति दिन र सरकारलाई प्रभावकारी तथा लोकप्रिय बनाउन तत्काल पार्टी सचिवालयको बैठक राख्न बारम्बार सहमतिका लागि जोड गर्नुभयो ।
यसबीच अनेकपटक अध्यक्ष कमरेड प्रचण्डले बैठक बोलाउन अनुरोध गर्दासमेत अध्यक्ष कमरेड केपी शर्मा ओलीले बेवास्ता गरिरहनुभयो । सबै राजनीतिक नियुक्तिहरुलाई सचिवालयलाई जानकारी दिने तथा सुझाव लिएर मात्र कार्यान्वयन गरिनेछ भनी कमरेड केपी शर्मा ओलीकै अध्यक्षतामा समेत बसेका स्थायी कमिटी र सचिवालयले पटक–पटक गरेका निर्णयका विपरीत आफूखुसी सबै राजनीतिक नियुक्ति गर्न थाल्नु भएपछि स्थिति झनै गम्भीर बन्यो ।
उपरोक्त अवस्थालाई मध्यनजर गरेर कार्यकारी अध्यक्ष कमरेड अध्यक्षले बालुवाटार प्रधानमन्त्री निवासमा पुगेर सचिवालयको बैठक बस्न अनुरोध गर्दा एकाएक अब पार्टी एकता समाप्त भयो, आ–आाफ्ना पार्टी चलाउन लागौं भनेर ठाडो जवाफ दिनुभयो । फेरि पनि उत्तेजनामा नआउन अनुरोध गर्दै जे–जे भन्नुपर्ने हो, ती सबै सचिवालयको बैठकमै छलफल गरेर टुंगो लगाऔं भन्दा सचिवालय तपाईंको गुट हो, स्थायी कमिटी हुल्लडवाज कमिटी हो र केन्द्रीय कमिटी सडकछाप कमिटी हो, यिनीहरुको बैठकको के आवश्यकता भन्दै पार्टीका यी सर्वोच्च निकायलाई अपमान गर्न थाल्नुभयो । त्यतिमात्र होइन, यी सबै कमिटीमा तपाईंको बहुमत छ, मैले यी कमिटीहरुको बहुमतलाई मान्दै मान्दैन पनि भन्नुभयो ।
अध्यक्ष प्रचण्डले म कार्यकारी अध्यक्षको हैसियतले बैठक बोलाउँछु र छलफल चलाई समस्या समाधान गर्न पहल गर्छु भन्दा त्यसो गरेकै दिन पार्टी फुट्यो भनेर आफूले लिने बताउनु हुँदै बैठक बस्न असहमति जनाउनुभयो र कार्यकारी अध्यक्षको हैसियत नमान्ने भावको अभिव्यक्ति दिनुभयो । तत्पश्चात कार्यकारी अध्यक्षका तर्फबाट २०७७ कार्तिक २१ गते पार्टी कार्यालय धुम्वाराहीमा सचिवालयको अनौपचारिक बैठक बोलाइयो । प्रधानमन्त्रीको समेत जिम्मेवारी सम्हाल्नुभएका पार्टी अध्यक्षको यस्तो विचारले उक्त अनौपचारिक वैठकमा उपस्थित हामी सवैलाई ज्यादै चिन्तित र गम्भीर बनाएको छ ।
हाम्रो दृढ धारणा छ; राष्ट्र तथा जनताको हित, पार्टी तथा आन्दोलनको आवश्यकता, आम कार्यकर्ता तथा शुभेच्छुकको चाहाना र जनादेशलाई केन्द«मा राख्दै पार्टीको विधि, पद्दति र निर्णयलाई सबैले पालना एवं कार्यान्वयन गर्ने गरी पार्टी एकताको रक्षा गर्नु र जनताले अहिले भोगिरहेको संकट तथा कष्टको समाधान गर्नु आजको अपरिहार्य आवश्यकता हो । त्यसका लागि तत्काल सचिवालयको र त्यसपछि आवश्यकताअनुसार अन्य केन्द्रीय निकायहरुको बैठक बस्नु अनिवार्य भएको छ । तसर्थ, हामी तपाईलाई कार्यकारी अध्यक्षका तर्फबाट बैठकको आयोजना गर्न गरिएको पहलप्रति सहमति जनाउँदै यथाशीघ्र सचिवालयको बैठक बस्न अनुरोध गर्दछौं ।
हार्दिक अभिवादनसहित !
पुष्पकमल दाहाल ‘प्रचण्ड’– अध्यक्ष, माधवकुमार नेपाल–वरिष्ठ नेता, झलनाथ खनाल –वरिष्ठ नेता, वामदेव गौतम – उपाध्यक्ष, नारायणकाजी श्रेष्ठ – प्रवक्ता
मितिः २०७७ । ०७ । २२
