केही दिनदेखि चर्को विवाद र बहसको विषय बनेको बहुचर्चित ‘गुठी विधेयक’ अन्ततः सरकारले फिर्ता लिएको छ । मंगलबार पत्रकार सम्मेलन नै गरेर भूमि व्यवस्था, सहकारी तथा गरीबी निवारणमन्त्री पद्मा अर्यालले विधेयक फिर्ता लिइएको घोषणा गरेकी हुन् ।
वैशाख १५ मा राष्ट्रियसभामा दर्ता भएको यो विधेयकले गुठी मास्ने प्रयत्न गरेको भन्दै चौतर्फी विरोध भएपछि विधेयक फिर्ता लिन सरकार बाध्य भएको हो । सो विधेयकलाई लिएर भ्रम सिर्जना गर्ने र वातावरण बिथोल्ने कोसिस भएको भन्दै सरोकारवालासँग थप छलफल आवश्यक देखिएकाले विधेयक फिर्ता लिएको जानकारी मन्त्री अर्यालले दिएकी छन् ।
