स्थानीय सुन्तला र जुनारले यहाँको बजार ओगटन थालेको छ । जुनार तथा स्थानीय पहाडि जातका सुन्तलाले उचित मूल्य पाउन थालेपछि पछिल्लो समय किसान व्यावसायिक रुपमा सुन्तला खेतीतर्फ लागिपरेका हुन् ।
१० वर्ष अगाडिसम्म आफ्नो बगैंचामा फलेको सुन्तला नुनसँग साटने गरेकामा अहिले वार्षिक २ लाखदेखि ३ लाखसम्ममा आम्दानी हुन थालेकाले यो सुनको रुपमा स्थापित भएको कृषक किसान राईले बताए ।
मध्यपहाडी लोकमार्गसँगै गाउँ-गाउँसम्म कच्ची सडक निर्माण भई जिल्लालाई सिधैँ तराईका ठूला सहरसँग जोडिएपछि सुन्तलाले बजार पाउन थालेको हो ।
स्वादिष्ट तथा स्वास्थ्यकर फलको रुपमा चिनिने सुन्तला अहिले घर बगैंचाबाटै गाउँघरकै र जिल्ला बाहिरका ठेकेदारले लिने गरेको सिद्धेश्वरका व्यवसायी कमल राईको भनाइ छ । जिल्लामा अहिले सुन्तला कलिलो हुँदै ठेकेदार गाउँ छिरेर बगैंचानै ठेक्का लिने गरेका छन् ।
विदेश गएर अरुको देशमा दःुख गर्नुभन्दा आफ्नै गाउँघरमा व्यावसायिक खेती गारी मनग्य आम्दानी लिन सकिने सुन्तलाको नर्सरी तथा व्यावसायिक सुन्तलाखेती गर्दै आउनु भएका विष्णुप्रसाद अधिकारीको भनाइ छ ।
सुन्तलाखेतीतिर कृषक आकर्षित भएपछि जिल्ला कृषि विकास कार्यलय तथा जिल्लामा रहेका इलाका कार्यलयबाट बिरुवा उमार्ने याममा कृषकलाई ५० प्रतिशतको सहुलियतमा बिरुवा उपलब्ध गराइएको कार्यलयका प्राविधिक सहायक रामयतन यादपले बताउनुभयो ।
