सरकारले बीउ उत्पादन राष्ट्रिय अभियान सञ्चालन गरेर बीउ उत्पादनमा आत्मनिर्भर बनाउन खोजे पनि जिल्लाका कृषक आलुको बीउ खरिद गर्न भारत जान बाध्य छन् ।
अहिले झापासहित तराईका जिल्लामा कृषकले आलु रोप्ने तयारी गर्दैछन् । जिल्ला कृषि विकास कार्यालयले स्रोत केन्द्रमार्फत कृषकलाई आलुको बीउ उत्पादन गर्न अनुदान दिएको थियो । तर पर्याप्त बीउ उत्पादन हुन नसक्दा कृषक भारतबाट खरिद गरी रोप्न थालेका राजगढका कृषक केशव बराल बताउछन् ।
माग गरे बमोजिम सरकारले समयमै आलुको बीउ उपलब्ध गराउन नसकेका कारण यहाँका कृषकले कानपुर, लालगुलावलगायत भारतीय प्रजातिका आलुको बीउ रोप्ने गरेका छन् । कृषि कार्यालयले ५० प्रतिशत अनुदानमा टिपीएस र पिबिएस प्रजातिका बीउ प्रदान गरे पनि प्रसस्त मात्रामा उत्पादन हुन सकेन ।
जिल्लामा कुप्री, सिन्धुरी, कार्डियर, डेजिरे, खुमलरातो, टिपिएस, सठियालगायत प्रजातिका आलुको बीउ लगाउने गरिएको छ । कृषिउपज थोक बजार बिर्तामोडकी तथ्याङ्क सहायक माया राजवंशीका अनुसार आव २०७२/७३ मा जिल्लामा ८५ करोड ६३ लाख ७१ हजारको ३८ हजार ३ सय ८ मेट्रिक टन आलु बिक्री भएको थियो ।
