पेरिस साँ जाँमा (पीएसजी) का अध्यक्ष नासेर अल खेलाफीले शुक्रबार क्लब परिवर्तनका लागि विश्व रेकर्ड कायम गरेका ब्राजिलियाली विश्वप्रसिद्ध फुटबल खेलाडी नेयमारको ख्याति आगामी दुई वर्षभित्र दोब्बर हुने बताएका छन् ।
स्पेनी फुटबल क्लब बार्सिलोनाबाट २ करोड ६४ लाख अमेरिकी डलर बराबरको क्लब स्थानान्तरण शुल्क तिरेर पीएसजीले नेयमारलाई भित्र्याएको हो । यो स्थानान्तरण रकम अहिलेसम्मकै उच्च शुल्क हो ।
२५ वर्षीय ब्राजिलियाली फुटबल अग्रपंक्तिका खेलाडीको स्पेनी क्लबबाट हुने स्थानान्तरण शुल्कले विश्वलाई आश्चर्यमा पारेको छ । यस अघिको रेकर्डमा सबैभन्दा बढी स्थानान्तरण शुल्क फ्रान्सका नागरिक पाउल पोग्वालाई म्यानचेस्टर युनाइटेडले तिरेको थियो । उक्त शुल्क नेयमारको अहिलेको शुल्कको तुलनामा आधा मात्र थियो ।
नेयमारको साथमा शुक्रबार पत्रकार सम्मेलनमा सहभागी भएका अल खेलाफीले भने– “विश्वमा दुई नेयमार छैनन् । आगामी दुई वर्षमा हामी भेट हुँदा नेयमारको मूल्य (ख्याति) कति हुनेछ भन्ने विषयमा तपाईंहरूलाई म बताउन चाहन्छु । हेर्दै जानोस्, कम्तिमा पनि दोब्बर हुनेछ ।”
पीएसजीसँग अनुबन्ध भएपछि पहिलो पटक सार्वजनिक प्रतिक्रिया दिँदै नेयमारले भने– “मैले अाफू चुनौती भोग्न तयार रहेको महशुस गरेको छु । नयाँ समूहका मेरा साथीहरुलाई सहयोग गर्न मैले आजैदेखि हर कुरा गर्नेछु ।”
बार्सिलोनालाई छाड्ने निर्णय लिन निकै कठीन भएको जनाउँदै नेयमारले क्लब र क्लबसम्बद्ध सबैलाई धन्यवाद दिएका छन् । पीएसजी गत च्याम्पियन्स लिगमा अन्तिम ८ मा परेको थियो ।
हप्तौंदेखिको अनुमानपछि बुधबार अभ्यासका लागि बार्सिलोनामा पुगे पनि नेयमारले सोही दिन स्पेनको बार्सिलोना क्लब छाड्ने कुरा बताएका थिए । बार्सिलोनाले नेयमारलाई आफ्नो भविष्य रोज्ने छुट भएको बताए पनि उनले बार्सिलोना क्लब छोड्दा तिर्नुपर्ने रकमका विषयमा भने निकै विवाद गरेको थियो ।
