निजी क्षेत्रबाट सञ्चालित बोर्डिङ स्कुलहरूमा प्रायः सरकारी पाठ्यक्रम अनुसार पढाइ नभएको गुनासो आइरहेका सन्दर्भमा त्यस्ता गुनासा सम्बोधन गर्ने उद्धेश्यका साथ ललितपुर प्याब्सनले पाठ्यक्रमसम्बन्धी एकदिने कार्यशाला बहस सम्पन्न गरेको छ ।
डीएभी स्कुल जावलाखेलमा शनिबार सम्पन्न कार्यशालामा पाठ्यक्रम विकास केन्द्र, विषय लेखक तथा केही विज्ञहरु समेत सहभागी भए । सो कार्यशालामा ललितपुर जिल्लाभरका करिव सात सय विभिन्न विषय शिक्षक सहभागी रहे ।
कार्यशालामा ललितपुर प्याब्सनका अध्यक्ष शिव कार्कीले कार्यशालाको औचित्य प्रष्ट्याए । परीक्षा नियन्त्रक काप्रीले जीपीए तथा प्राक्टिकल विषयसम्बन्धी धारणा राखे । गणित, विज्ञान, नेपाली, सामाजिक र जनसंख्या विषय विभाग बनाई करिव पाँच घन्टा लामो पाठ्यक्रम बहस हुँदा अधिकांश विषय शिक्षकहरुले किताब लेखक तथा प्रकाशनप्रति टिप्पणीमूलक समस्या राखे ।
जलपानसहित टुंगिएको बहस कार्यक्रमको सञ्चालन निरोज महर्जनले गरे । पाठ्यक्रम विकास केन्द्र र लेखकहरुका कारण विद्यार्थीको भविष्य अन्योल नबनोस् भन्ने टिप्पणी राख्दै कार्यशालाको समापन गरियो।
