प्रधानमन्त्री केपी ओलीको लिखित निर्देशनमा त्रिभुवन विश्वविद्यालयले निजी शिक्षण संस्थालाई फाइदा पुग्ने गरी सम्बन्धन दिएको छ ।
ओलीले आफ्नै नेतृत्वको मन्त्रिपरिषदको निर्णयविपरीत यस्तो निर्देशन दिएका हुन् । साउन दोस्रो साता मन्त्रिपरिषद् बैठकले निजी क्याम्पसलाई दिने सम्बन्धन स्थगित गर्ने निर्णय गरेको थियो । कुलपति समेत रहेका प्रधानमन्त्रीले साउन २२ मा कलेजहरूलाई विषय र कार्यक्रम थपको अनुमति (सम्बन्धन) दिन त्रिविलाई पत्र पठाएका छन् ।
‘विश्वविद्यालयहरूको स्वायत्तता कायम राख्दै यसभन्दा अगाडि विश्वविद्यालयहरूले गर्दै आएको विषय र कार्यक्रम थपसम्बन्धी प्रक्रिया यथावत् राख्न प्रधानमन्त्रीज्यूको निर्देशन भएकाले सोहीअनुसार गराउनुहुन अनुरोध छ’– पत्रमा उल्लेख छ । त्यसै अनुसार त्रिविले १ सय १६ कलेजलाई विषय थप्न अनुमति दिएको छ ।
बीसीए र बीबीएम विषयमा सम्बन्धन पाउने अधिकांश राजधानीका महँगा र नाम चलेका ‘ठूला’ कलेज छन् । तीमध्ये ९६ वटाले सम्बन्धनपत्र लिइसकेको खबर आइतबारको कान्तिपुर दैनिकमा प्रकाशित छ ।
