नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीसम्बद्ध विद्यार्थी संगठन अखिल (क्रान्तिकारी) का केन्द्रीय अध्यक्ष चिरञ्जीवी ढकाल पक्राउ परेका छन् । विद्यार्थी नेता ढकालको पक्राउविरूद्ध ११ विद्यार्थी संगठनले संयुक्त विरोध प्रकट गर्दै ‘दमन र धरपकड’ बन्द गर्न सरकारलाई ‘चेतावनी’ दिएका छन् ।
५५ औं विद्यार्थी एकता दिवसको अवसरमा बुधबार ११ विद्यार्थी संगठनहरुले राजधानीमा संयुक्त विरोधसभा सम्पन्न गरे । विरोधसभामा बोल्दै विद्यार्थी नेताहरुले शान्तिपूर्ण कार्यक्रममा धरपकड नगर्न सरकारलाई चेतावनी दिएका हुन । राज्यले पछिल्लो समय विद्यार्थी संगठनमाथि धरपकड गरेको र विद्यार्थी नेताहरुलाई पक्राउ गरेकोप्रति विरोध जनाउँदै उनीहरुले राज्यको गलत नीतिको भण्डाफोर गरिने बताए ।
तत्कालीन पञ्चायती व्यवस्थाको जगजगी रहेको समयमा राजनीतिक दलहरु प्रतिबन्धित थिए । त्यस्तो बेला जनताका हक–अधिकार प्राप्तिको संघर्षमा युवा विद्यार्थीहरुले नेतृत्वदायी भूमिका निर्वाह गरेका थिए । सोही सन्दर्भमा वि.सं. २०२१ मा विभिन्न चारबुँदे माग राखेर संयुक्त विद्यार्थी संगठनहरुले आह्वान गरेको आन्दोलनमा राज्यले व्यापक दमन गरेर धेरै विद्यार्थीहरुलाई घाइते बनाएको थियो । तर, विद्यार्थीहरुको संयुक्त आन्दोलन रोकिएन र अन्त्यमा राज्य जनताको आँखामा छारो हाल्नैका लागि मात्र भए पनि केही सुधार गर्न बाध्य भएको थियो । त्यही संयुक्त विद्यार्थी आन्दोलनको सम्झना र सम्मानमा त्यस यताका हरेक जेठ १ लाई विद्यार्थी दिवसका रुपमा मनाइँदै आइएको छ ।
यसै सन्दर्भमा नेपाल कम्युनिस्ट पार्टी (क्रान्तिकारी माओवादी), विप्लव नृतृत्वको नेकपा, गोपाल किराती नेतृत्वको माओवादी केन्द्र निकट अखिलहरु र नेविसंघ, अखिल पाँचौं, नयाँ शक्ति विद्यार्थी, राजपा विद्यार्थी, समाजवादी विद्यार्थी, राष्ट्रवादी विद्यार्थी संघ, नेपाल विद्यार्थी युनियन, नेपाल क्रान्तिकारी विद्यार्थी संघलगायतका ११ विद्यार्थी संगठनले बुधबार कार्यक्रम सम्पन्न गरेका हुन् ।
