मोहन वैद्य ‘किरण’ नेतृत्वको नेकपा (क्रान्तिकारी माओवादी), नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी, मोहनविक्रम सिंह–चित्रबहादुर केसी नेतृत्वको नेकपा (मसाल), बाबुराम भट्टराई नेतृत्वको नयाँ शक्ति (हाल समाजवादी) र मधेसवादी शक्तिनिकट गरी ५ पत्रकार संगठनहरु संयुक्त ‘प्रतिरोध’ मा उत्रिएका छन् ।
‘वामपन्थी’ भनिएको वर्तमान सरकारले हालै ल्याएको पञ्चायती कालरात्रिलाई माथ गर्ने खाले प्रतिगामी ‘मिडिया काउन्सिल विधेयक’ का विरुद्ध पाँच पत्रकार संगठन एक ठाउँमा उभिएका हुन् । क्रान्तिकारी पत्रकार महासंघ, जनपत्रकार संगठन, प्रगतिशील पत्रकार संघ, नेपाल प्रेस सोसाइटी र मधेसी पत्रकार नेपालले ‘संयुक्त पत्रकार संघर्ष समिति’ बनाएर सो विधेयकविरुद्ध संयुक्त रुपमा आन्दोलन चर्काउने उदघोष गरेका छन् ।
ती संगठनहरुले शनिबार राजधानीमा आयोजना गरेको ‘प्रेस तथा अभिव्यक्ति स्वतन्त्रता र नागरिक अधिकारको प्रश्न’ विषयक अन्तर्क्रिया कार्यक्रममा बोल्ने सबै वक्ताहरुले प्रस्तावित विधेयकको चर्को विरोध गरे । कार्यक्रममा नेकपा (क्रान्तिकारी माओवादी) का महासचिव मोहन वैद्य, राष्ट्रिय जनमोर्चाका अध्यक्ष चित्रबहादुर केसी, महासंघका अध्यक्ष इन्द्र राउत, संगठनका अध्यक्ष प्रकाश डुम्रेलगायतले सम्बोधन गरे । कार्यक्रममा केही दिनअघि प्रहरीले हिरासतमा लिएर हालै मुक्त भएका पत्रकार जितेन्द्र महर्जनलाई खादा ओढाएर सम्मान समेत गरियो ।
