प्रतिनिधिसभाको विशेष अधिवेशनमा सोमबार प्रधानमन्त्री खड्ग ओलीले मागेको विश्वासको मत नदिई पदमुक्त गराउन निर्णायक भूमिका निर्वाह गरेको झलनाथ खनाल–माधवकुमार नेपाल नेतृत्वको पक्षले ओली पराजित भइसकेपछि त्यसो गर्नुपर्नाको कारणबारे प्रष्ट्याएको छ ।
सो पक्षका तर्फबाट वरिष्ठ नेता माधवकुमार नेपालले सोमबार साँझ आठ पृष्ठको विज्ञप्ति जारी गर्दै ओलीका बदमासी, बेइमानी र गल्तीहरुको फेहरिस्त प्रस्तुत गरेका हुन् । ‘उहाँका गलत क्रियाकलापहरूको विरोध र प्रतिवाद गर्दै देश, जनता र लोकतन्त्रको भविष्य सुरक्षित गर्नको लागि आ–आफ्नो स्थानबाट योगदान गर्नु सबै देशभक्त, लोकतन्त्र प्रेमी राजनीतिकर्मी तथा जनसमुदायको कर्तब्य हुने भएकोले सोही अनुरुप हामीले प्रधानमन्त्री केपी ओलीलाई विश्वासको मत नदिने र प्रतिनिधि सभाको बैठकमा अनुपस्थित हुने निर्णय गरेका हौं । यो निर्णय हाम्रो देश, जनता र पार्टीप्रतिको निष्ठाको द्योतक हो’– वरिष्ठ नेता नेपालले भनेका छन् ।
