यमनको राजधानी नजिकै भई रहेको एक अन्त्येष्टि कार्यक्रमको स्थानमा वुधबार रातभरी भएको हवाई आक्रमण परी ८ महिला र १ बालकको मृत्यु भएको चिकित्सक स्रोतले बिहीबार जानकारी दिए ।
यस हवाई आक्रमण परी अन्य १० महिला घाइते भएका छन् । सानाबाट ४० किलोमिटर उत्तरतर्फ पर्ने अमर्हाब जिल्लामा अन्त्येष्टि समारोहमा महिला बर्ग जम्मा भइरहेका स्थानमा सो आक्रमण भएको जनाएकाे छ ।
यमनको राजधानीमा कब्जा गरी बसेका हुथी विद्रोहीहरुले साउदी अरेबियाआवद्ध संयुक्त गठबन्धनले यो आक्रमण गराएको दाबी गरेका छन् । तर संयुक्त गठबन्धनका प्रवक्ताले यस विषयमा तत्काल कुनै टिप्पणी गरेकाे छैन ।
यस आक्रमणबाट मारिएका र घाइतेको सङ्ख्या भने साना अस्पतालले पुष्टि गरेको छ ।
साउदी अरेबियासँग आवद्ध संयुक्त गठबन्धनले सन् २०१५ को मार्च महिनाबाट सैनिक हस्तक्षेप गरेपछि यमनमा द्वन्द्व जारी रहेको छ ।
संयुक्त राष्ट्र सङ्घका अनुसार गत २ वर्षयता यमनमा जारी द्वन्द्वमा परी ७ हजार ४ सय भन्दा बढी व्यक्तिको मृत्यु भएको छ । यसमा १ हजार ४ सय बालबालिका रहेका पनि संयुक्त राष्ट्र सङ्घले जानकारी दिएको छ ।
