अफगानिस्तानको उत्तरी क्षेत्रमा २४ घन्टा यता परेको हिमपातका कारण भएको अत्यन्त चिसोका कारण १४ व्यक्तिको मृत्यु भएको अधिकारीहरुले साेमबार बताएकाे छ ।
यस प्रकोपबाट मृत्यु हुनेमा दुईजना बालबालिकासमेत रहेका छन् । अधिकारीहरुका अनुसार जावजान प्रान्तमा हिमपात र अत्यन्त चिसोका कारण १० व्यक्तिको मृत्यु भएको छ । त्यसैगरी छिमेकमा पर्ने प्रान्त सरिपुलमा भएको यस प्रकोपमा परी चार व्यक्तिको मृत्यु भएको छ ।
२४ घन्टाभित्र भएको भारी हिमपातका कारण ती १४ व्यक्तिले ज्यान गुमाएका जिल्ला गभर्नर रहमतुल्लाह हसारले सिन्ह्वा समाचार समितिलाई जानकारी दिएको छ ।जावजान प्रान्तको छिमेकमा पर्ने सरिपुल प्रान्तमा अन्त्यन्त चिसो र हिमपातबाट दुई बालबालिकासहित थप ५ व्यक्तिको मृत्यु भएको राष्ट्रिय प्रकोप व्यवस्थापन अधिकारी अजिज रहमानले जानकारी दिएकाे छ ।
त्यसैगरी यस प्रकोपबाट उत्तरी प्रान्त बदाख्सान ४ व्यक्तिको मृत्यु हुनुका साथै अन्य ८ घाइते भएका बताएको छ ।
युद्धले तहसनहस बनाएको यस देशमा अति चिसोका कारण दुई हप्तायता १५० भन्दा बढी व्यक्तिको मृत्यु भइसकेको छ ।
