राजधानीको सामाखुसीबाट १ लाख रुपैयाँ घुससहित ४ जना प्रहरी पक्राउ परेका छन् । सामाखुसीस्थित एउटा मिठाई पसलबाट १ लाख रुपैयाँ घुससहित ४ जना प्रहरी रंगेहात पक्राउ परेको अख्तियार दुरुपयोग अनुसन्धान आयोगका प्रवक्ता प्रदीप कोइरालाले जानकारी दिएका छन् ।
घुस लेनदेन भइरहेको जानकारी पाएपछि पुगेको अख्तियारको टोलीले छापा मारेर ट्राफिकका ३ जना र २ नम्बर गणका १ सहित ४ जना प्रहरी जवानलाई पक्राउ गरेको प्रवक्ता कोइरालाले बताए ।
पक्राउ परेका प्रहरीको नाम खुलाइएको छैन । उनीहरुले बीमा रकम दाबीका लागि सवारी दुर्घटना प्रमाणित गर्ने कागजात बनाइदिन भन्दै एक सेवाग्राहीबाट उक्त घुस लिएको प्रारम्भिक अनुसन्धानबाट खुलेको छ ।
