त्रिभुवन विश्वविद्यालयबाट जारी भएका स्नातक र स्नातकोत्तर तहका नक्कली प्रमाणपत्रहरूसहित धुलिखेल नगरपालिका– ५, श्रीखण्डपुर, काभ्रेपलाञ्चोकका ४८ वर्षीय विकास श्रेष्ठलाई प्रहरीले सोमबार पक्राउ गरेको छ ।
श्रेष्ठको साथमा त्रिभुवन विश्वविद्यालयबाट जारी भएका स्नातक र स्नातकोत्तर तहका नक्कली प्रमाणपत्रहरू रहेको सूचना प्राप्त हुनासाथ काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उक्त शैक्षिक योग्यताका प्रमाणपत्रहरू सम्बन्धी अनुसन्धान सुरू गरेको हो । ब्याचलर डिग्री इन विजनेस स्टडिज र मास्टर्स डिग्री इन विजनेस स्टडिजका ती ट्रान्स्क्रिप्ट त्रिभुवन विश्वविद्यालयको अभिलेखमा भिडाएर हेर्दा मेल नखाएको भनी त्रिभुवन विश्वविद्यालय परीक्षा नियन्त्रण कार्यालय परीक्षा प्रशासन महाशाखाको पत्र प्रहरीले प्राप्त गर्यो ।
उक्त जानकारी भएपछि प्रहरीले उनलाई धुलिखेल नगरपालिका– ५, काभ्रेपलान्चोकबाट पक्राउ गरेको हो । थप अनुसन्धान तथा कारबाहीका लागि उनलाई जिल्ला प्रहरी परिसर काठमाडौं पठाइएको केन्द्रीय प्रहरी समाचार कक्षले जनाएको छ ।
