कांग्रेस सभापति शेरबहादुर देउवाले सरकार अल्पमतमा परेकाले आफूहरू प्रधानमन्त्री पदबाट केपी शर्मा ओलीले राजीनामा दिने विश्वासका साथ प्रतीक्षारत रहेको बताएका छन् ।

बुधबार बसेको नेकां संसदीय दल तथा राजधानीमा उपलब्ध केन्द्रीय सदस्यहरूको संयुक्त बैठकबाट बाहिरिने क्रममा देउवाले आफूहरू ओलीको राजीनामा पर्खिरहेको प्रतिक्रिया दिएका हुन् ।

बैठक नयाँ बानेश्वरस्थित संसद भवनमा बसेको थियो । प्रमुख प्रतिपक्षी दलका नेता समेत रहेका सभापति देउवाले ‘एमालेले त प्रधानमन्त्री पदका लागि तपार्इंलाई प्रस्ताव एवम् समर्थन गर्दैछ रे नि होइन ?’ भन्ने सञ्चारकर्मीको जिज्ञासामा जवाफ दिँदै भने– ‘अब त्यो प्रस्ताव ढिलो भइसक्यो ।’ देउवाको यो भनाइले प्रधानमन्त्री पदका निम्ति कांग्रेले माओवादी अध्यक्षलार्इ अघि सार्ने सहमति गरिसकेको स्पष्ट संकेत गरेको छ ।