संसदमा पहिले बजेटसँग सम्बन्धित विधेयकहरूमाथि छलफल गर्ने कि अविश्वासको प्रस्तावमाथि छलफल गर्ने भन्नेमा दलहरु आ–आफ्नै अडानमा रहेपछि बिहीबार बोलाइएको संसद बैठक अनिश्चित बनेको छ ।
नेपाली कांग्रेस र नेकपा (माओवादी केन्द्र) ले संसदमा प्रधानमन्त्रीविरुद्ध अविश्वासको प्रस्ताव दर्ता भइसकेकाले पहिले तय भएको संसदको कार्यसूचीमा छलफल हुन नसक्ने अडान राखेका छन् ।
उता सत्ता नेतृत्व गरेको एमालेले भने अविश्वासको प्रस्तावअघि बजेटसँग सम्बन्धित विधेयकमाथि छलफल चलाउन दबाब दिने निर्णय गरेको छ । यसैकारण संसदको बैठक भीडन्तमा परिणत हुने देखिएको छ ।
दलहरुले आ–आफ्नो अडान नछाड्दा संसद बैठकमा के हुन्छ भन्ने अन्यौल बढेको छ । संसदमा हुन सक्ने अवरोध नियन्त्रणका लागि मर्यादापालकको संख्या बढाइएको छ ।
दलहरुका बीचको विवादमा संसदभित्र अप्रिय घटना हनु नदिन प्रहरीले संसद सचिवालयसँगको समन्वयमा कसिलो सुरक्षा योजना बनाउँदै मार्सलको संख्या बढाएको हो ।
यसअघि ९ सय १ जना खटिँदै आएकोमा अहिले थप ३० जना मर्यादापालक खटाइन लागेको छ । बैठक बिहीबार ११ बजेका लागि बोलाइएको छ ।
