संसदीय सुनुवाइ विशेष समितिले विभिन्न देशका लागि प्रस्तावित राजदूतको सुनुवाइ प्रारम्भ गरेको छ । समितिले पाकिस्तान, ब्राजिल र संयुक्त अधिराज्य (बेलायत) का लागि प्रस्तावित राजदूत तथा संयुक्त राष्ट्रसङ्घीय कार्यालय, भियनामा खटिएर जाने स्थायी प्रतिनिधिको मंगलबारदेखि सुनुवाइ गरिरहेको छ ।
परराष्ट्र सेवामा रहेका सहसचिव सेवा लम्साल अधिकारी, ताराप्रसाद पोखरेल, प्रकाश सुवेदी र डा. दुर्गाबहादुर सुवेदीको मंगलबार सुनुवाइ भइरहेको छ । समितिले प्रस्तावित राजदूतमध्ये सेवा लम्साल अधिकारीबाट सुनुवाइ प्रारम्भ गरिएको हो ।
त्यसअघि बैठकको प्रारम्भमा उजुरीकर्तालाई बोलाएर जानकारी लिइएको थियो । प्रस्तावित राजदूतमाथि विभिन्न विषयसँग जोडेर ९ वटा उजुरी परेका छन् । सरकारले परराष्ट्र सेवाका ८ र राजनीतिक पृष्ठभूमि भएका परराष्ट्र सेवा बाहिरका १४ गरी २२ जनाको नाम राजदूतका लागि प्रस्ताव गरेको छ ।
प्रधानमन्त्री केपी शर्मा ओलीको नेतृत्वमा रहेको सरकारले लामो समयदेखि खालि रहेका राजदूत पदमा नियुक्तिका लागि विभिन्न व्यक्तिको नाम छनोट गरी संसदीय सुनुवाइका लागि पठाएको हो ।
संसदीय सुनुवाइ समिति गठनमा भएको ढिलाइ तथा मुलुकमा विकसित पछिल्लो राजनीतिक घटनाक्रमले सुनुवाइको काम ओझेलमा परेको थियो । राजदूत सरकारका प्रतिनिधिका रुपमा रहने भएकाले सरकारले आफू अनुकूलका व्यक्तिलाई राजदूतका रुपमा पठाउने चलन रहिआएको छ ।
