सोमबार काठमाडौंबाट काभ्रेपलाञ्चोकका कोशीपारी कात्तिकेदेउरालीतर्फ जाँदै गर्दा बिर्ता देउरालीमा भएको बस दुर्घटनामा परी मृत्यु भएका व्यक्तिका छोराछोरीलार्इ निःशुल्क पठनपाठनको व्यवस्था मिलाउन अनेरास्ववियुले पहल गर्ने भएको छ ।
अनेरास्ववियुकी अध्यक्ष नविना लामाले सो घटनाका सम्पूर्ण घाइतेहरुको शिघ्र स्वास्थ्यलाभको कामना तथा मृतक व्यक्तिको आत्माको चीर शान्तिको कामना र मृतक परिवारलाई दुःखद् घडीमा धैर्यधारणको क्षमता मिलोस् भन्ने कामना गर्दै मृतकका छोराछोरीलाई निःशुल्क पठनपाठनको व्यवस्था मिलाउन पहल गर्ने जानकारी गराएकी हुन् ।
बस दुर्घटनामा परी अनेरास्ववियु केन्द्रीय विदेश विभाग प्रमुख येशु लामा समेत घाइते भएकी छन् । लामाको अहिले दीर्घायु अस्पतालमा उपचार भैरहेको छ ।
सो बस दुर्घटनामा २७ को निधन भैसकेको छ भने ४३ घाइते भएका छन् । घाइतेको अहिले धुलिखेल अस्पताल, त्रि.वि. शिक्षण अस्पताल, दीर्घायु अस्पताल, राष्ट्रय ट्रमा सेन्टरलगायत भिभिन्न अस्पतालमा उपचार भैरहेको छ।
काभ्रेपलाञ्चोकस्थित न्युजकोसेली संवाददाताले दिएको जानकारी अनुसार दुर्घटनाग्रस्त बसका चालक र सहचालकको अवस्था अझै अज्ञात छ ।
