स्रोतका अनुसार दाहालको सन्देशमा विशेषतः चार महत्वपूर्ण बुँदा छन् । पहिलो, दाहालले आफ्नो सरकारको प्राथमिकता संविधानमा आवश्यक संशोधन गरी त्यसलाई सर्वस्वीकार्य बनाएर छिटो चुनावमा जाने उल्लेख गरेका छन् । त्यसका लागि मधेसी मोर्चा र जनजातिका अुन्तुष्टि सम्बोधन गर्ने गृहकार्य सुरु भइसकेको जनाएका छन् ।
दोस्रो, नयाँ सरकार भारतसँगको सम्बन्धलाई सुमधुर बनाउन तयार भएको उल्लेख गरिएको छ । विगतमा दुई देशबीच देखिएका केही असाझदारी अब पूर्ण रुपमा हटेको दाहालले उल्लेख गरेका छन् ।
तेस्रो, उच्चस्तरमा द्विपक्षीय भ्रमण गराउने दाहालको सन्देश छ । यस्ता भ्रमणबाट दुई देशबीचको सम्बन्धले थप उचार्इ ग्रहण गर्ने उल्लेख गरिएको छ । र, चौथो, नयाँ सरकार विकासका परियोजनालाई अगाडि बढाउन चाहन्छ र त्यसका लागि भारतको सहयोग आवश्यक पर्ने उल्लेख छ ।
प्रधानमन्त्री प्रचण्डले यसअघि नै भारतीय पक्षलाई आफूले अगाडि बढाउन चाहेका परियोजनाको सूची नै बुझाइसकेको स्रोतको भनाइ छ । मोदीले नेपालमा बनेको नयाँ गठबन्धनलाई पूर्ण रुपमा सहयोग गर्ने आश्वासन दिएको भेटमा सहभागी एक अधिकारीले बताएको आजको कान्तिपुरमा समाचार छ ।
