NewsKoseli.Com

२०२२ को वर्ल्डकपका लागि कतारले नेपालसँग माग्यो ‘सुरक्षा गार्ड’

गृहमन्त्री र कतारी तथा बेलायती राजदूतबीच भेटवार्ता

काठमाडौं, २ साउन ।

 

गृहमन्त्री रामबहादुर थापा ‘बादल’ सँग नेपालका लागि कतारका राजदुत युसुफ बिन मोहम्मद तथा संयुक्त अधिराज्य (बेलायत) का राजदुत रिचार्ड मोरिसबीच शिष्टाचार भेटवार्ता भएको छ ।

मंगलबार गृह मन्त्रालयमा भएका छुट्टाछुट्टै भेटमा नेपाल–कतार तथा नेपाल–बेलायतबीच द्विपक्षीय सम्बन्ध, आपसी हित र सहकार्यका विषयमा छलफल भएको गृहमन्त्री थापाका प्रेस संयोजक किरण भट्टराईले जनाएका छन् ।

गृहमन्त्री थापाले कतारी राजदूतसँगको भेटमा कतारले त्यहाँ कार्यरत नेपालीहरुको सेवा–सुविधा तथा सुरक्षाका विषयमा राजदूतसँग जिज्ञासा राख्दै सुझाव दिए । अन्य क्षेत्रमा समेत दुई देशबीच सहकार्यका लागि गृहमन्त्री थापाले आग्रह गरे ।

राजदूत मोहम्मदले यस वर्ष नेपाल र कतारबीच कूटनीतिक सम्बन्धको ४० वर्ष पुगेको अवसरमा गृहमन्त्री थापालाई कतार भ्रमणका निम्ति आग्रह गरे ।

कतारले सन् २०२२ मा विश्वकप फुटबलको आयोजना गर्न गइरहेको सन्दर्भमा सुरक्षा गार्डमा ठूलो संख्यामा नेपालीहरुलाई लैजान कतार इच्छुक रहेको र त्यसका लागि आवश्यक परे छुट्टै सम्झौता गर्न आफूहरु तयार रहेको उनले बताए । रोजगारीका लागि कतारमा हाल पाँच लाखभन्दा बढी नेपाली पुगेका छन् ।

त्यसैगरी, बेलायती राजदूतसँगको भेटमा गृहमन्त्री थापाले नेपालको विविध क्षेत्रको विकासमा बेलायतले गर्दै आएको सहयोगप्रति धन्यवाद दिँदै आगामी दिनमा पनि सहयोगले निरन्तरता पाउने विश्वास व्यक्त गरे ।

बेलायती सेनामा कार्यरत नेपालीहरुका केही समस्या रहेको सुनिएको भन्दै गृहमन्त्री थापाले सोबारे चासो व्यक्त गरे । राजदुत मोरिसले नेपाल–बेलायत सम्बन्धको चर्चा गर्दै नेपालले तीव्रत्तर विकास गरोस् भन्ने आफूहरुको चाहना रहेको बताए ।

नेपालमा बेलायती लगानी भित्र्याउन आफूले सक्दो पहल गर्ने समेत राजदुत मोरिसले बताए । विपद् व्यवस्थापन, सुरक्षा निकायको तामिल र उपकरणलगायतका क्षेत्रमा गृह मन्त्रालयसँग समन्वय गरेर काम गर्न आफूहरु तयार रहेको पनि उनले बताए ।

पछिल्लो समय गृह मन्त्रालयले सुरु गरेको राष्ट्रिय तथा अन्तर्राष्ट्रिय गैरसरकारी संस्थाको नियमनका विषयमा समेत भेटमा छलफल भयो ।

प्रतिकृया दिनुहोस्

आजको तिथि, मिति र अहिलेको समय

ट्विटरमा न्युजकोसेली

आजको विनिमय दर