नेपाल कम्युनिस्ट पार्टी (नेकपा) का वरिष्ठ नेता तथा पूर्वप्रधानमन्त्री झलनाथ खनालले दुईतिहाइ बहुमतको सरकारसँग चिढिएको नेपाली काङ्ग्रेस अनर्गल प्रचारबाजीमा जुटेर भ्रम पैदा गराउने खेलमा लागेको आरोप लगाएका छन् ।
सुनसरीको दक्षिणी क्षेत्र देवानगञ्ज गाउँपालिकामा आइतबार आयोजित बृहत् सभा तथा कार्यकर्ता प्रवेश कार्यक्रममा बोल्दै नेता खनालले जनमतबाट बढारिएको काङ्ग्रेसले सरकारलाई कमजोर देखाउन हरसम्भव प्रयास गरिरहेको बताए । ‘काङ्ग्रेस आफ्नै पार्टीभित्रको बढ्दो असन्तुष्टि र गुटका कारण अत्तालिएको छ,’ उनले भने– ‘काङ्ग्रेस नेकपाको सरकारविरुद्ध दुष्प्रचारमा केन्द्रीकृत छ ।’
विभिन्न समयमा मुलुकको बागडोर सम्हाले पनि दीर्घकालीन सोच र दूरदृष्टिको अभावका कारण नेपाली काङ्ग्रेसले देश र जनताको सवालमा केही गर्न नसकेको आरोप समेत नेता खनालले लगाए । मुलुकको समृद्धि र विकासमा वर्तमान सरकारले कायापलट गरेको दाबी उनले गरे ।
कार्यक्रममा नेकपाका प्रदेश नं. १ इन्चार्ज भीम आचार्य, प्रदेश नं. १ का उद्योग, पर्यटन, वन तथा वातावरणमन्त्री जगदीशप्रसाद कुसियैतलगायतले आ–आफ्नो धारणा राखे । कार्यक्रममा रामचरण मेहता, रामचन्द्र मेहतासहित काङ्ग्रेस, राजपा र सङ्घीय समाजवादी फोरमका ३ सयभन्दा बढी स्थानीय नेता–कार्यकर्ता आ–आफ्ना पार्टी परित्याग गरी नेकपामा प्रवेश गरेको खबर राससले प्रेषित गरेको छ ।
