नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीका मध्यकमान्ड इन्चार्ज हेमन्तप्रकाश ओली ‘सुदर्शन’ की छोरीले दर्ता गराएको बन्दी प्रत्यक्षीकरणको रिट सर्वोच्च अदालतले खारेज गरिदिएको छ ।
सर्वोच्च अदालतका न्यायाधीशद्वय अनिलकुमार सिन्हा र टंक मोक्तानको संयुक्त इजलासले ओलीकी छोरी विपनाद्वारा दायर बन्दी प्रत्यक्षीकरणको रिट निवेदनलाई खारेज गर्ने फैसला बुधबार गरेको हो । नेता ओलीलाई बुधबार नै सर्वोच्चमा उपस्थित गराइएको थियो ।
नख्खुस्थित एनसेलको कार्यालय अगाडि फागुन १० मा गराइएको बम बिस्फोटको जिम्मा लिएका नेकपाका स्थायी समिति सदस्य ओलीलाई प्रहरीले चैत ९ मा पक्राउ गरेको थियो । छोरी विपनाले आफ्ना बुबालाई प्रहरीले गैरकानुनी थुनामा राखेकाले थुनामुक्त गर्न आदेश माग गर्दै चैत १३ मा सर्वोच्च अदालतमा रिट दिएकी थिइन् ।
नख्खु विस्फोटमा परेर लमजुङका ४९ वर्षीय सिंहप्रसाद गुरुङको मृत्यु भएको थियो । विस्फोटमा ललितपुर– ४ की २६ वर्षीया प्रतीक्षा खड्का र बनेपाकी २५ वर्षीया उरुसा मानन्धर घाइते भएका थिए । प्रहरीका अनुसार नख्खुमा टाइम बम राखिएको थियो । सोही दिन कमलपोखरीको आँगन मिठाइ पसल अगाडि रिमोट कन्ट्रोलबाट चल्ने प्रेसर कुकर बम समेत राखिएको दावी प्रहरीले गरेको थियो ।
नेता ओलीलाई प्रहरीले काभ्रेको खानीखोला गाउँपालिका– ४, बरूणबेंसीबाट चैत ९ गते बिहान सबेरै पक्राउ गरेको थियो । नख्खु विस्फोटको जिम्मेवारी लिएसँगै नेता ओली प्रहरीको सर्वाधिक खोजीमा परेका थिए । महानगरीय प्रहरी अपराध महाशाखा, काभ्रे प्रहरी र विशेष ब्युरोको टोलीले उनीसहित विप्लव नेतृत्वको नेकपाका ८ जना नेता–कार्यकर्तालाई एकैसाथ पक्राउ गरेको थियो ।
नेपाल कम्युनिस्ट पार्टीको चौथो वरियतामा रहेका नेता ओली कार्यकर्तासहित काठमाडौं आउँदै गर्दा बाटैमा पक्राउ परेको प्रहरीले जनाएको छ । काठमाडौं आउने क्रममा प्रहरीले सवारी साधन चेकजाँच गर्दा नेता ओलीसहित धर्म राजवाहक, रामकृष्ण खतिवडा, शंकर अधिकारी, विजय श्रेष्ठ, ललित तामाङ, सञ्जीव कार्की, देव घिमिरे र लोकेन्द्र खड्का पक्राउ परेका थिए ।
