सरकारले ‘प्रतिबन्ध’ लगाएको भनिएको नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ ले वार्ताप्रति खासै आशावादी नरहेको सन्देश दिएका छन् । आफूहरुले उठाएका विषयको समाधान वार्ताले गरिहाल्छ भन्नेमा विश्वस्त हुन नसकिने उनले बताएका छन् ।
भूमिगत रहेका महासचिव विप्लवले पार्टी ‘प्रतिबन्ध’ पछि पहिलो पटक दिएको अन्तर्वार्तामा वार्ताका लागि सरकारले औपचारिक आग्रह समेत नगरेको दाबी गरेका छन् । ‘वार्ताबाट न हामी तर्सिन्छौं न त क्रान्तिले उठाएका विषयलाई वार्ताले समाधान गरिहाल्छ भन्नेमा विश्वस्त छौं’– उनले भनेका छन् ।
एनसेलमाथिको ‘कारबाही’ पछि सरकारले आफ्नो पार्टीमाथि ‘प्रतिबन्ध’ लगाएको उनको भनाइ छ । उनको पार्टीले पूर्वप्रधानमन्त्री एवं सत्ताधारी पार्टीका केन्द्रीय अध्यक्षसहितका शीर्ष नेताहरुको हत्या गर्ने योजना बनाएको भनी सरकार गराएको प्रचारबाजीको पनि महासचिव विप्लवले खण्डन गरेका छन् । शीर्ष नेताको हत्या गर्ने योजना आफूहरुले बनाएको भन्ने प्रचारबाजी हल्ला मात्रै भएको उनले दावी गरेको खबर सोमबारको अन्नपूर्ण पोस्ट दैनिकमा प्रकाशित छ ।
