राष्ट्रिय परीक्षा बोर्डका अध्यक्ष प्रा.डा. चन्द्रमणि पौडेल नेतृत्वको कार्यदलले लकडाउनको स्वरुप परिवर्तन भए जेठ अन्तिमदेखि एसईई परीक्षा सञ्चालन गर्नेगरी सरकारलाई सुझाव दिएको छ । कार्यदलले शिक्षा, विज्ञान तथा प्रविधिमन्त्री गिरिराजमणि पोखरेललाई सो सुझाव बुझाएको हो ।
२५ वैशाखभित्र कक्षा १ देखि ९ को नतिजा प्रकाशन गर्ने र सामाजिक दुरी कायम गर्दै भीडभाड नहुने गरी भौतिक दुरी कायम गराएर २५ वैशाखपछि भर्ना प्रकिया अगाडि बढाउने सुझाव दिइएको हो । विद्यार्थीले आफ्नो घरबाट खाना खाएर परीक्षा दिन जान सक्ने गरी परीक्षा केन्द्र बनाउने सुझावसहितको प्रतिवेदन शिक्षामन्त्रीलाई बुझाइएको छ ।
प्रतिवेदन उच्चस्तरीय समिति र क्याबिनेटमा लैजाने शिक्षामन्त्री पोखरेलले बताए । राष्ट्रिय परीक्षा बोर्डका अध्यक्ष प्रा.डा. पौडेल नेतृत्वको कार्यदलले माध्यमिक शिक्षा परीक्षा (एसईई) जेठ अन्तिम साता गर्न सिफारिस गरेको हो । कार्यदलले बिहीबार शिक्षा, विज्ञान तथा प्रविधिमन्त्री पोखरेललाई बुझाएको प्रतिवेदनमा २५ वैशाखपछि लकडाउनको मोडल फरक भए जेठ अन्तिम सातादेखि एसईई परीक्षा गर्न सकिने उल्लेख छ ।
यस्तै, एसईई र कक्षा १२ को परीक्षा एउटै समय दुई सिफ्टमा गर्न पनि सिफारिस गरेको खबर शुक्रबारको राजधानी दैनिकमा प्रकाशित छ ।
