नेपाल कम्युनिस्ट पार्टी (नेकपा) का निवर्तमान अध्यक्ष एवं प्रधानमन्त्री खड्ग ओलीले सो पार्टी विभाजनको पहिलो सन्देश प्रवाह गर्ने गरी आफ्नो गुटको बैठकमार्फत एकलौटी ढंगले महाधिवेशन आयोजक समिति गठन गरेका छन् । प्रधानमन्त्रीको सरकारी निवास बालुवाटारमा मंगलबार बिहान बसेको गुटको बैठकबाट ओलीले बेग्लै राजनीतिक यात्रा तय गरेका हुन् ।
आइतबार असंवैधानिक ढंगबाट मन्त्रिपरिषदमार्फत संसद विघटनको सिफारिस गरी राष्ट्रपतिमार्फत संसद भंग गराएर वैशाख १७ र २७ मा प्रतिनिधिसभाको मध्यावधि निर्वाचन घोषणा गराएका ओलीमाथि सोही दिन बसेको नेकपाको स्थायी कमिटीको बैठकले कारबाही गरिसकेको छ । ओली अध्यक्षमा बहाल नरहेको जानकारी नेकपाले सोमबारै निर्वाचन आयोगलाई समेत गराइसकेको छ ।
हाल कायम नेकपाको ४४६ सदस्यीय केन्द्रीय कमिटीमा ४४१ सदस्य बहाल छन् । तीमध्ये पुगनपुग १०० जनाको उपस्थितिमा ओलीले पार्टीमा हाल रहेका कसैमाथि कारबाही नगर्ने बताए । उनले अहिले कायम पूरै केन्द्रीय कमिटीको संख्या समावेश गरी तत्काल ५५६ जना थपेर बाँकी सदस्य पछि थप्ने गरी ११९९ सदस्यीय महाधिवेशन आयोजक समिति घोषणा गरेको बालुवाटार स्रोतले जनाएको छ ।
‘हामी पार्टी फुटाउँदैनौं, फुटाउन पनि चाहादैनौं र कसैलाई कारबाही पनि गर्दैनौं,’ बैठकलाई सम्बोधन गर्दै ओलीले भने– ‘पार्टी एकता अझ सुदृढ बनाएर लान्छौं र महाधिवेशनबाट नयाँ पुस्तामा नेतृत्व हस्तान्तरण गरेर बिदा लिन्छौं ।’
