प्रधानमन्त्री एवं एमाले अध्यक्ष खड्ग ओलीले सो पार्टीका पूर्वपार्टी प्रमुख, पूर्वप्रधानमन्त्री एवं वरिष्ठ नेता माधवकुमार नेपाल तथा पूर्वमन्त्री, सांसद एवं सो पार्टीका उपाध्यक्ष भीमबहादुर रावलमाथि कडा ‘एक्सन’ लिएका छन् ।
वरिष्ठ नेता नेपाल र उपाध्यक्ष रावललाई ओलीले सोमबार ‘कारबाही’ गरेका हुन् । ओलीले दुवै नेतालाई सोमबार पत्र पठाउँदै छ महिनाका लागि पार्टी सदस्यताबाटै निलम्बन गरिएको जानकारी दिएका छन् ।
यसअघि एमालेको ओली समूहले एकलौटी ढंगबाट पार्टीमा कब्जा जमाउँदै वरिष्ठ नेता नेपाल, उपाध्यक्ष रावलसहित उपमहासचिव घनश्याम भुसाल र नेता सुरेन्द्र पाण्डेलाई ‘पार्टी विधानविपरीत गतिविधि गरेको’ आरोप लगाएर ‘स्पष्टीकरण’ मागेको थियो । सो ‘स्पष्टीकरण’ को ‘चित्तबुझ्दो जवाफ नदिएको’ भन्दै अध्यक्ष ओलीले दुई शीर्ष नेतामाथि सोमबार ‘कारबाही’ गरेका हुन् ।
नेपाल र रावलले भने ‘स्पष्टीकरण’ को ‘जवाफ’ दिने क्रममा ओलीमाथि नै प्रतिप्रश्न गर्दै अध्यक्ष स्वयं पार्टीका विधि, विधान र संविधानको खिलाफमा गएकाले उनी नै कारबाहीको भागीदार किन नबन्ने भनी प्रश्न गरेका थिए ।
