मोहन वैद्य ‘किरण’ नेतृत्वको नेकपा (क्रान्तिकारी माओवादी) का एक केन्द्रीय सदस्य निष्काशित भएका छन् । लामो समयदेखि पार्टी र नेतृत्वको सम्पर्कमा नआई पार्टीविरोधी गतिविधिमा रहेको भन्दै केन्द्रीय सदस्य कृष्ण गुरूङ ‘असमान’ लाई केन्द्रीय समिति सदस्यबाट निष्काशन गरिएको सो पार्टीका महासचिव किरणले सोमबार जारी गरेको विज्ञप्तिमा उल्लेख छ ।
‘हाम्रो पार्टीका केन्द्रीय समितिका सदस्य कृष्ण गुरुङ ‘असमान’ लामो समयसम्म पार्टीको सम्पर्कमा नरहेको, अनुशासनहीन गतिविधिमा संलग्न रहेको, पार्टीभित्र गुटबन्दी गरी अन्य विपक्षी पार्टीमा जान कुरा चलाएको, कार्यालयबाट भेटेर कुरा गर्न खोज्दा भेट गर्न नचाहेको र उहाँ आफैंले विपक्षी पार्टीमा जानेबारे छलफल चलाइरहेको कुरा स्वीकार गरेको हुनाले उहाँलाई पार्टीको केन्द्रीय समिति सदस्यबाट निष्काशन गरिएको छ’– महासचिव किरणले विज्ञप्तिमा लेखेका छन् ।
