सत्ताधारी गठबन्धन तत्कालै टुट्छ भनेर यो गठबन्धन बनेकै दिनदेखि दिनहुँ ‘भविष्यवाणी’ गर्दै आएका एमाले अध्यक्ष खड्ग ओली अब भने अत्तालिँदै तिल्मिलाउन थालेका छन् ।
लोकतान्त्रिक शेर्पा संघको कार्यक्रमलाई राजधानीमा शनिबार सम्बोधन गर्दै ओलीले गठबन्धनविरुद्ध असन्तुष्टि पोखे । ‘निर्वाचन पहिल्यै गठबन्धन किन बनाएको ? आगामी निर्वाचनअघि नै पाँचदलीय गठबन्धनले नपुगेर अझ विस्तार किन गर्नुपरेहको हो ?’
दलहरुले एक्लाएक्लै चुनाव लड्नुपर्ने र चुनावपछि सरकार गठनका लागि मात्रै गठबन्धन बनाउनुपर्ने ओलीको भनाइ छ । मा एमालेलाई रोक्न चुनावअघि नै गठबन्धन भइरहेको बताउँदै ओलीले भने– ‘पाँच दलीयले नपुगेर अझ गठबन्धन विस्तारका लागि कुदिराख्या छन् । यो गठबन्धन किन बनाउनुपर्यो ? यति साह्रो गठबन्धन किन बनाउनुपर्यो ?’
चुनावमा आ–आफ्ना एजेन्डा लिएर जानुपर्ने र चुनावपछि कसको सरकार बनाउने भन्ने बेलामा मात्रै गठबन्धनमा जानुपर्ने उनको भनाइ छ । ‘एमालेलाई बहुमत ल्याउनबाट रोक्नका लागि यो गठबन्धन हो,’ ओलीले भने– ‘एमालेले संविधान र कानुनवमोजिम सुशासन कायम गर्दै शान्ति र सुरक्षा व्यवस्था कायम गर्ने एवं भ्रष्टाचार नियन्त्रण गर्ने भएकाले देशलाई शान्ति सुव्यवस्था, भ्रष्टाचार नियन्त्रण, सुशासनको बाटोमा अगाडि लैजान नदिनका लागि गठबन्धन बनाइएको छ ।’
