आइतबार राजधानीमा बाबुराम भट्टारार्इ नेतृत्वको नयाँ शक्ति नेपाल नामक पार्टीको औपचारिक घोषणा हुँदैछ । नयाँ शक्तिका प्रवक्ता खिमलाल देवकोटाले पार्टी घोषणाका क्रममा हुने आम्दानी र खर्चको अनुमानित विवरण शनिबार राति न्युजकोसेलीलार्इ उपलब्ध गराएका छन् ।
नेता देवकोटाले दिएको विवरण अनुसार नयाँ शक्ति घोषणाका क्रममा १ करोड ७६ लाख ६५ हजार ३ सय २३ रूपैयाँ संकल हुँदैछ । त्यसैगरी सो क्रममा कूल १ करोड ५ लाख खर्च हुँदैछ ।
प्रवक्ता देवकोटाले विज्ञप्तिमा तयारीका सम्पूर्ण काम लगभग पूरा भएको जनाएका छन् । उनले भनेका छन्– ‘नयाँ शक्ति नेपालको पार्टी स्थापना घोषणासभा सम्पन्न गर्नका लागि देवेन्द्र पौडेलको संयोजकत्वमा मूल व्यवस्थापन समिति र विभिन्न कामको प्रकृतिअनुसार काम सम्पन्न गर्न १४ वटा उपसमितिहरु गठन भई आ–आफ्नो काम सम्पन्न गर्ने क्रममा छन् । आर्थिक समिति, जनपरिचालन व्यवस्थापन, प्रतिनिधि पर्यवेक्षक आवास व्यवस्थापन, मञ्च व्यवस्थापन, छलफल सत्र व्यवस्थापन, अतिथि सत्कार, प्रचार प्रसार र प्रकाशन, सांस्कृतिक टिम परिचालन, स्थास्थ्य व्यवस्थापन, स्वयंसेवक परिचालन, संघसंस्था निमन्त्रणा, कार्यालय व्यवस्थापन, भोजन व्यवस्थापन समितिहरु उपसमितिका रुपमा गठन भएका छन् ।’
यस्तो छ पार्टी घोषणाको तयारी :
इभेन्ट म्यानेजमेन्टलाई व्यावसायिक ढंगले मञ्च व्यवस्थापनको जिम्मा दिइएको छ ।
अडियो, भिडियो, प्रिन्ट सामग्री तयार गरी विभिन्न सञ्चार माध्यममार्फत प्रचार–प्रसारको काम भइराखेको छ ।
देशैभरि र प्रवासवाट समेत गरी १ लाख १४ हजार ५ सय ४६ जनाको सदस्यता फारम प्राप्त भएको छ ।
अतिथिका रुपमा देशभित्र क्रियाशील राजनीतिक दलहरुलाई, व्यवस्थापिका–संसदका सदस्यहरुलाई, विभिन्न संघ–संस्थाका प्रतिनिधि, नागरिक समाज, पेशागत संगठन तथा मिडियासम्बद्ध संस्था तथा व्यक्तिहरुलाई आमन्त्रण गरिएको छ ।
विदेशी मित्रहरु खासगरी वैकल्पिक राजनीतिक पार्टीहरुलाई आमन्त्रण गरिएको छ । यसै क्रममा बेलायत, कोसोभो, हंगेरी, श्रीलंका, भुटान, भारत, चीन, पाकिस्तान, वंगलादेशमा क्रियाशील राजनीतिक पार्टीहरु छन् । जसमध्ये युरोपियन अल्टरनेटिभ, रेड पार्टी नर्बे, द अल्टरनेटिभ डेनमार्कबाट आफ्नै पूर्वनिर्धारित कार्यक्रमका कारण उपस्थित हुन नसकेको जानकारीसहित शुभकामना पत्र प्राप्त भएको छ ।
देशभित्र रहेका २५ भन्दा बढी देशका राजदूतहरुलाई आमन्त्रण गरिएको छ, सभामा उहाँहरुको उपस्थिति हुनेछ ।
देशभरका १ लाखभन्दा बढी सदस्यहरु स्वयं उपस्थित भई सामूहिक रुपमा शपथग्रहण गर्ने कार्यक्रम रहेकाले सो सभालाई व्यवस्थापन गर्न उपत्यकाका कालिमाटी, कुपन्डोल, रत्नपार्क, तीनकुने गरी चार स्थानबाट कार्यक्रमस्थल रंगशालामा र्याली केन्द्रित हुनेछ । उक्त ठाउँबाट ट्राफिक व्यवस्थापन गर्दै नियमित आवागमनमा कुनै असर नपर्ने गरी रंगशालासम्मको यात्रा तय गरिएको छ । र्याली ठीक १२ बजे रंगशाला पुग्नेछ र कार्यक्रम आरम्भ हुनेछ । त्यसै अवसरमा विभिन्न राष्ट्रियताहरुको वेषभुषासहितका झाँकीहरु प्रदर्शन गरिनेछ ।
३ वटा दस्तावेज प्रस्तुत र छलफल हुने
जेठ ३१ र ३२ गते कमलादीस्थित प्रज्ञा प्रतिष्ठानमा छलफल सत्रको आयोजना गरिएको छ । सो छलफल सत्रमा ‘नयाँ शक्तिका आधारतत्व’ शीर्षकमा राजनीतिक प्रतिवेदन, संगठनात्मक सिद्धान्त र विधान तथा ‘विकास र समृद्धिको मार्गचित्र’ शीर्षकमा अर्को दस्तावेज गरी तीनवटा दस्तावेज प्रस्तुत हुनेछन् । उक्त दस्तावेजहरुउपर छलफल गर्न प्रतिनिधिहरुलाई दस समूहमा विभाजन गरिनेछ । दस्तावेजलाई सुझावसहित अन्तरिम रुपमा लागू गर्ने गरी महाधिवेशनसम्मै छलफलमा पठाइनेछ ।
यसरी पार्टी घोषणा, सामूहिक शपथ–ग्रहण एवं छलफल सत्र सम्पन्न गरी एक वर्षभित्रै महाधिवेशन सम्पन्न गर्ने घोषणा हुनेछ । त्यसपछि स्थानीय र प्रदेश स्तरका अधिवेशनहरु सम्पन्न गरिनेछन् ।
देवकोटाले विज्ञप्तिको अन्त्यमा भनेका छन्– ‘अन्तमा, राष्ट्रिय भेला सम्पन्न गर्न विभिन्न क्षेत्रबाट सहयोग गर्ने सबैप्रति हार्दिक धन्यवाद ज्ञापन गर्दछौं । खासगरी प्रचारप्रसारमा श्रब्य, श्रब्य–दृश्य, प्रिन्ट, अनलाइन तथा सिनेमा हललगायतका सबै माध्यमबाट प्रचार सामग्री सम्प्रेषण गर्न सहयोग पुर्याउनुहुने सबै सञ्चार माध्यमहरुप्रति हार्दिक आभार प्रकट गर्दै निरन्तर सहयोगको अपेक्षा पनि गर्दछौं ।’
