युक्रेनी राष्ट्रपति पेट्रो पोरोसेन्कोले मङ्गलबार नेटोमा युक्रेनको सदस्यता एउटा ‘सामरिक लक्ष्य’ भएको बताउँदै यसमा पश्चिमा मुलुकले शङ्का नगर्न आग्रह गरेका छन् ।
युरोप तथा केही अन्य पश्चिमा मुलुकले पूर्वसोभियत राज्य युक्रेनलाई सदस्यता दिन आनाकानी गरिरहेका बेला पोरोसेन्कोको यो भनाई आएको हो ।
केही नेटो सदस्य राष्ट्रले युक्रेनलाई नेटोको सदस्यता प्रदान गर्नु रसियालाई थप क्रोधित तुल्याउने कारक तत्व बन्नसक्ने धारणा राख्दै यस विषयमा राम्ररी सोचेर मात्र निर्णय लिनुपर्ने धारणा राख्दै आएका छन् ।
पोरोसेन्कोले युक्रेनलाई युरोपियन युनियन (ईयू) को सन् २०२० सम्म सदस्यता प्राप्त गर्ने लक्ष्य बनाएका छन् । सन् २०१४ मा युक्रेनमा रसियाली पक्षधर विद्रोहीले सशस्त्र विद्रोह गर्दा करिब १० हजार मानिसले ज्यान गुमाएका छन् । यसमा युक्रेनले रसियाद्वारा युक्रेनी नागरिकलाई देशविरोधी आन्दोलन गर्न उक्साएको आरोप लगाएको छ भने रसियाले यसको प्रतिवाद गर्दै आएको छ । रासस/एएफपी
