धितोपत्र बजारमा यस साता निकै उतारचढावपूर्ण रुपमा कारोबार भयो ।नेपाल स्टक एक्स्चेन्जका अनुसार सोमबार बजार ५ प्रतिशतले घटेको र मङ्गलबार ५ प्रतिशतले बढ्दा ‘सर्किट ब्रेक’ नै लगाउनुपरेको थियो ।
यो साता बजारमा ६ अर्ब ५ करोड ६५ लाख ८८ हजार कारोबार भएको छ । साताको पहिलो दिन आइतबार सामान्य गिरावट देखिएको बजारमा १ सय ४१ कम्पनीका २१ लाख १६ हजार ३ सय ५४ कित्ता सेयर खरिद बिक्रीबाट एक अर्ब ५३ करोड १४ लाख ७४ हजार ६ सय ७६ को सेयर कारोबार भएको थियो ।
सो दिन नेप्से परिसूचक ३.८८ अङ्कले घटेर बैकिङ, जलविद्युत्, बिमा र उत्पादनमूलक समूहका सूचक रातो भएका कारण बजार प्रभावित भएको थियो ।
सोमबार बजार यो वर्षकै उच्च ८८ दशमलव ८१ अङ्कले घटेर नेप्से परिसूचक १ हजार सय ७५.९१ अङ्कमा झरेर रोकिएको थियो । उच्च अङ्कको गिरावटले गर्दा बजार डेढ घन्टा पहिले नै बन्द भयो । सो दिन ११ लाख ६२ हजार ५ सय ७१ कित्ता सेयर खरिदबिक्रीबाट ८७ करोड ९३ लाख ८१ हजारको कारोबार भएको छ ।
साताको तेस्रो दिन मङ्गलबार भने पँुजी बजारमा २ पटक ‘सर्किट ब्रेक’ लगाउँदा समेत नेप्से परिसूचक ८४. ५१ ले बढेर २९ करोड ८३ लाख कारोबार भयाे, भने बजार १ हजार ७६०.४२ अङ्कमा पुगेको थियो ।
बुधबार बजारले अघिल्लो दिनकै लय समात्दै १९.१५ अङ्कले बढेको थियो । कुल १ सय ४६ कम्पनीका ३५ लाख ८१ हजार ४ सय ७५ कित्ता सेयर खरिदबिक्री भएको उक्त दिन कारोबार साताभरकै उच्च अर्थात् २ अर्ब २ करोड ८७ लाख ५९ हजार ७ सय ७९ बराबरको भएको छ ।
कारोबारका हिसाबले साताको अन्तिम दिन बिहीबार भने सेयर बजारमा सामान्य गिरावट आयो । कुल ३५ लाख ४४ हजार ७ सय ८४ कित्ता सेयर खरिदबिक्रीबाट एक अर्ब ३१ करोड ८६ लाख ७२ हजार ५ सय ७५ को कारोबार भएको बिहीबार बजार ४.७० अङ्कले घटेर १ हजार ७ सय ७४.८७ अङ्कमा झरेकाे छ ।
