कोलडाँडा गाविसस्थित सत्यवती गाउँका बासिन्दाले दालचिनीबाट मनग्य आम्दानी गरेका छन् ।
जिल्ला वन कार्यालयको सहयोगमा आठ वर्षदेखि यहाँ किसानले दालचिनी लगाउँदै आएका हुन् । आयआर्जनको भरपर्दो र दिगो व्यवसाय अहिले दालचिनी बनेको छ । दिनहुँजसो पात टिप्ने, बोक्रा ताछ्ने, सुकाउनमै किसान व्यस्त रहन्छन् । बर्सेनि प्रतिपरिवारले २ लाखभन्दा बढीको बोक्रा बिक्री गर्छन् ।
दालचिनीको आम्दानीलाई स्थानीयवासीले गाउँमा मोटरबाटो निर्माण, विद्युतीकरण लगायतका कामका लागि समेत खर्च गर्ने गरेका स्थानीय पार्वती चिदीले बताइन् । दालचिनीकै आम्दानीको भरमा आफ्ना छोराछोरीलाई बोर्डिङमा पढाउन थालेको स्थानीयवासी वसन्ती गाहा बताउछीन् ।
जिल्ला वन कार्यालयका सहायक वन अधिकृत चन्द्रबहादुर भाटका अनुसार कोलडाँडामा मात्र दालचिनीबाट वार्षिक २ करोड भित्रिन्छ । उक्त गाउँ बीउ उत्पादनको पकेट क्षेत्र समेत हो । वन कार्यालयकै समन्वयमा वार्षिक १० क्विन्टल बढी बीउ यहाँबाट अन्य जिल्लामा निर्यात हुन्छ ।
दालचिनीको बोक्रा गाउँको सङ्कलन केन्द्रमा प्रतिकिलो १०० तथा पात प्रतिकिलो ५० देखि ६० मा बिक्री गरिँदै आएको स्थानीय देवबहादुर गाहाले बताए। दालचिनी लगाएको जङ्गलमा डढेलो नलाग्ने, लगाएको ३ वर्षपछि आम्दानी लिन सकिने भएपछि यहाँका किसानको दिगो व्यवसाय बनेको छ । एक वर्षमा करिब १० महिनासम्म निरन्तर पात बिक्री गर्न सकिन्छ ।
सरकारले स्वदेशमै प्रशोधन गर्न सके दालचिनीबाट थप आयआर्जन गर्न सकिने स्थानीय कृषकहरु बताउँछन् ।
