कर्मचारीवृत्तमा सुपरिचित र दोस्रो संविधानसभाको निर्वाचन गराउन सफल हुनुको मुख्य श्रेय पाएकै कारण धेरैको प्रिय बनेका पूर्वगृहमन्त्री माधवप्रसाद घिमिरे आफ्ना दुई भाइसहित आइतबार साँझदेखि त्रिशूली नदीमा बेपत्ता छन् ।

उनी चढेको गाडी आइतबार साँझ त्रिशूली नदीमा खसेर उनीहरु बेपत्ता भएदेखि नै कुरिनटारको घोप्टेभीरमा अवस्था बुझ्न आउनेको भीडभाड छ । सोमबार बिहान सबेरैदेखि घिमिरेका इष्टमित्र, आफन्त हुँदै नेपाल सरकारका उच्चपदस्थ कर्मचारी समेत घटनास्थल आइपुगे ।

चितवन र छिमेकी जिल्लाका प्रमुख जिल्ला अधिकारीसहित सुरक्षा निकायका जिल्लास्थित प्रमुख पनि घोप्टेभीर पुगेर उनको खोजीका लागि सहयोग गरिरहेका छन् ।

सोमबार बिहान घटनास्थल घोप्टेभीरमा बिलौना गरिरहेकी दीपा आचार्य घिमिरेसँगै मुक्तिनाथ यात्राको एक जना सहयात्री हुन् । दीपाका बुबाका मामाको छोरा (ठूलोबुबा) घिमिरे परिवारसँगै आचार्य पनि असोज ५ गते काठमाडौंबाट मुक्तिनाथ यात्रामा गएकी थिइन् ।

आचार्यले भनिन्– “बिहान ७ बजे हामी काठमाडौंबाट हिँडेका थियौं । गाडीमा माधवप्रसाद घिमिरे, उहाँका भाइ प्रकाश, काकाको छोरा मोहन, नाताले काका पर्ने नारायणप्रसाद काफ्ले र चालकसहित दुई सुरक्षाकर्मी थिए ।” असोज ५ गते राति बेनीमा बास बसी यात्रा तय गरेको बताउँदै आचार्यले भनिन्– “असोज ६ गते जोमसोममा बसियो । असोज ७ गते त्यहींबाट कागबेनीमा गएर श्राद्ध गरी साँझ फेरि जोमसोममा नै बसियो ।”

उनले अगाडि भनिन्–  “असोज ८ गते बिहान जोमसोमबाट हिँडियो, म बेनीमा झरें, उहाँहरु बागलुङकालिका दर्शन गरी पोखरा गएर बस्नुभयो । असोज ७ गते घिमिरेले र असोज ८ गते काफ्लेले श्राद्ध गर्नुभएको थियो ।” आचार्यका पिता यादव आचार्य म्याग्दी जिल्लाको सहायक प्रमुख जिल्ला अधिकारी हुन् ।

असोज ९ गते बिहान निजी तथा आवासीय विद्यालय अर्गनाइजेसन (प्याब्सन) कास्कीका अध्यक्ष चिनु रानाभाटसँगै बिहानको खाना खाएर उनीहरु हिँडेका हुन् ।

घटनास्थलमा आइपुगेका रानाभाटले भने– “हामीसँगै लेकसाइडको मोनालिसा रेस्टुराँमा खाना खाएर बिहान ११ः१५ बजे उहाँहरु पोखराबाट हिँड्नु भएको हो ।” उनीहरुले दिउँसो विमलनगरमा चिया–खाजा खाएको समेत रानाभाटले बताए । दिउँसो २ः३० बजे फोन गर्दा उनीहरु विमलनगर भएको बताउँदै रानाभाटले यो घटना सुन्दा आफूलाई सपनाजस्तो लागेको बताए ।

घटनास्थलमा निकै दुःखित देखिएका यादव आचार्य मुक्तिनाथ यात्रा क्रममा उनीहरुसँगै थिए । आचार्य माधव घिमिरेका फुपूका छोरा भाइ हुन् । “साँझ ५ बजे मैले दाइलाई फोन गरें, धेरै बेरपछि सुरक्षाकर्मीले फोन उठाए, हामी आत्तिएर आइपुग्यौं । अहिले पनि घटना सपनाजस्तै लाग्छ” उनले भने । उनका अनुसार माधव घिमिरे र भाइ प्रकाश वनस्थलीमा बस्छन् । अन्दाजी ४८ वर्षीय प्रकाश खेलकुद परिषद्का कर्मचारी हुन् ।

काकाका छोरा अन्दाजी ५० वर्षीय मोहन पनि वनस्थलीमै बस्छन् । उनी नेपाल टेलिकमका कर्मचारी भएको आचार्यले बताए । अन्दाजी ६५ वर्षीय नारायण काफ्ले राष्ट्रिय वाणिज्य बैंकका निवृत्त कर्मचारी हुन् । उनको बसाइ मध्यबानेश्वरस्थित कात्यायनी मन्दिरछेउमा छ । प्रहरी नायब निरीक्षक रामचन्द्र कार्की सिन्धुलीका हुन् ।

आचार्यका अनुसार पूर्वगृहमन्त्री एवम् मुख्यसचिव घिमिरेकी श्रीमती कमला र बुहारी आकांक्षा काठमाडौंकै घरमा छन् भने छोरा सुशान्त अस्ट्रेलियाबाट आउँदै छन् । छोरी सृष्टि पाल्पा मेडिकल कलेजमा चौथो वर्षमा अध्ययनरत छिन् ।

घटनास्थलमै भेटिएका घिमिरेका काकाका छोरा धनेन्द्रले घटनास्थल निरीक्षण गर्न आएका मन्त्री रमेश लेखकसँग यही ढङ्गबाट खोजी गर्दा पत्ता लाग्न नसक्ने भन्दै थप स्रोत र साधनको प्रयोग गर्न आग्रह गरे ।

पानीभित्र पसेर बेपत्ताको खोजी गर्न सक्ने अत्याधुनिक उपकरण भैदिए उनीहरुलाई पत्ता लगाउन सकिने घिमिरेले बताए । सो क्रममा मन्त्री लेखकले यस विषयमा प्रधानमन्त्रीसँग तत्काल टेलिफोन सम्पर्क गरी खोजीकार्यलाई थप प्रभावकारी बनाउने आश्वासन दिए । लगत्तै उनले प्रधानमन्त्रीलाई फोन समेत गरे ।

घिमिरेको गृहजिल्ला पाल्पा सहित देशभर छरिएर रहेका आफन्त कुरिनटारस्थित घटनास्थल आइपुगेका छन् भने उनकै समयदेखि सरकारी सेवामा रहेका पनि आउने क्रम जारी छ । घटनास्थलमा उनको झोला र मोबाइल फेला परेका छन् । घिमिरेका तीनभाइ नदीमा बेपत्ता छन् भने आमा, काका काफ्ले, सशस्त्र प्रहरीका नायब निरीक्षक कार्कीको मृत्यु भएको छ । चालक नेपाल प्रहरीका हवल्दार विष्णु राई घाइते छन् ।