कोलम्बियाको सरकार र यहाँको विद्रोही पक्षबीच हालै शान्ति सम्झौता भएपछि दशाैं लामो द्वन्द्वको अन्त्य हुने आशा बढेको छ । करिब ५४ वर्षपछि यहाँको विद्रोही समूह युद्धविरामका लागि सहमत भयो र त्यसलगत्तै गतहप्तामात्र शान्ति सम्झौता सम्पन्न भएको हो ।
उक्त दुवै पक्षबीच भएको शान्ति सम्झौता यहाँका करिब ६२ वटा स्थानीय भाषामा अनुवाद गरिएको छ । कोलम्बियाको सरकार र यहाँका विद्रोही रिभोल्युसनरी आम्र्ड फोर्सबीच सो शान्ति सम्झौता भएको बताइएको छ ।
कोलम्बियाको संस्कृति मन्त्रालयले दिएको जानकारीअनुसार सरकार र उक्त विद्रोही पक्षबीच सो सम्झौता भएको थियो । उक्त सम्झौतालाई यहाँका स्थानीय भाषाभाषीले पनि बुझ्न सक्नेगरी सो अनुवाद गरिएको समाचारमा जनाइएको छ ।
कोलम्बियाका सबै जाति जनजाति तथा स्थानीय भाषाभाषीले सरकार र विद्रोहीका बीचमा सम्पन्न भएको सो शान्ति सम्झौतामा के छ भन्ने बारेमा थाहा पाउन भनेर सो अनुवाद गरिएको जानकारी उक्त मन्त्रालयले दिएको छ ।
शान्तिको भाषा सबै भाषाभाषीबाट पनि बोलियोस भन्ने उद्देश्यले यो काम गर्नु आवश्यक रहेको यहाँको सरकारले जनाएको छ । देशको पछिल्लो अवस्थाका बारेमा सबै भाषाभाषीका नागरिकले सुसूचित हुन पाउनु भनेको एक महत्वपूर्ण काम भएको जानकारी एकजना सरकारी अधिकारीले दिएका छन् ।
सरकार र उक्त विद्रोही पक्षका बीचमा भएको सो सम्झौता सबैले थाहा पाएका छन् कि छैनन् भन्ने बारेका साथै उक्त सम्झौताको कार्यान्वयनको लागि विद्रोही पक्ष इमान्दार छन् कि छैनन् भन्ने बारेमा पनि यसबाट जानकारी हुने सो मन्त्रालयले जानकारी दिएको छ ।
कोलम्बियामा जारी रहेको सो द्वन्द्वका कारण यहाँका विभिन्न स्थानीय जाति तथा जनजाति झन बढी मात्रामा प्रभावित भएको उक्त शान्ति सम्झौतामा उल्लेख गरिएको छ ।
यसअघि पनि क्युवाको हवानामा जम्मा भएका विभिन्न जाति जनजातिका नागरिकले कोलम्बियामा सुरु भएको शान्ति प्रयासलाई विभिन्न स्थानीय समुदायसम्म पुर्याएर सफल बनाउने बताएका थिए । कोलम्बियामा स्थानीय जातजातिको भाषा धेरै बोल्ने गरिन्छ । यहाँ धेरैथरी जनजाति रहेका छन् ।
