सत्ताधारी नेपाल कम्युनिस्ट पार्टी (नेकपा) का वरिष्ठ नेता तथा पूर्वप्रधानमन्त्री माधवकुमार नेपालले ‘दायाँबायाँ नगरी’ राष्ट्रियसभाका उम्मेदवारलाई मतदान गर्न आग्रह गरेका छन् ।
‘जेबी टुहुरेको निरन्तरता, भाग– चार’ कार्यक्रमलाई सम्बोधन गर्न सर्लाही आएका वरिष्ठ नेता नेपालले देशभक्तिको भावनासहित नेपाल कम्युनिस्ट पार्टी (नेकपा) र राजपाको संयुक्त गठबन्धनबाट खडा भएका चार उम्मेदवारलाई आफ्ना मतदाताले ‘दायाँबायाँ नगरी’ मतदान गर्न र तिनलाई जिताएर सामाजिक, सांस्कृतिक तथा आर्थिक रूपमा परिवर्तन ल्याउने काममा सहयोग गर्न आग्रह गरेका हुन् । माघ ९ मा हुने राष्ट्रियसभाको निर्वाचनमा प्रदेश– २ बाट नेपाल कम्युनिस्ट पार्टी (नेकपा) का राधेश्याम पासवान र तुलसा दाहालका साथै राजपाबाट मृगेन्द्रकुमारसिंह यादव र शेखरकुमार सिंह उम्मेदवार बनेर चुनावी मैदानमा उत्रेका छन् ।
सामाजिक, सांस्कृतिक तथा आर्थिक परिवर्तनमा गीत–सङ्गीतको ठूलो महत्त्व रहेको र टुहुरे पञ्चायतीकालदेखि नै सामाजिक, सांस्कृतिक तथा आर्थिक परिवर्तन ल्याउन गीत–सङ्गीतको यात्रामा लागेको भन्दै वरिष्ठ नेता नेपालले उच्च प्रशंसा गरे ।
पञ्चायतीकालविरुद्ध राजनीतिक सिद्धान्तलाई सार्थक बनाउन गीत–सङ्गीतको स्वरूपमा परिमार्जन गरी नेपाली राजनीतिमा परिवर्तन ल्याउन अरु टुहुरे जन्मिनु आवश्यक रहेको पूर्वप्रधानमन्त्री समेत रहेका नेपालले बताए ।
सर्लाहीको हरिवन नगरपालिका– ५ मा रहेको चेतना सन्देश नेपालद्वारा सञ्चालित द्वन्द्वपीडित बालगृहमा मङ्गलबारदेखि सुरु भएको चौतारी साँझ कार्यक्रमलाई सम्बोधन गर्न समेत सर्लाही आएका पूर्वप्रधानमन्त्री नेपाल र श्रम, रोजगार तथा सामाजिक सुरक्षामन्त्री रामेश्वर राय यादवसमक्ष उखु किसानले उखुको बक्यौता रकम नपाएको गुनासो गरे । नेपाल कम्युनिस्ट पार्टी (नेकपा) का केन्द्रीय सदस्य समेत रहेका श्रम, रोजगार तथा सामाजिक सुरक्षामन्त्री रायले जनताको विश्वास इमानदारीसाथ पूरा गर्ने प्रतिबद्धता जनाए ।
जेबी टुहुरे फाउन्डेसनको आयोजनामा भएको कार्यक्रममा प्रदेशसभा सदस्य बेची लुङ्गेली, डिल्लीप्रसाद उप्रेती, राष्ट्रियसभाका उम्मेदवार तुलसा दाहाल र राधेश्याम पासवान, सर्लाहीका प्रमुख जिल्ला अधिकारी मोहनराज जीसी, सबै नगरपालिका तथा गाउँपालिकाका प्रमुख तथा उपप्रमुखका साथै पार्टीका विभिन्न तह–तप्काका नेता–कार्यकर्ता सहभागी भएको खबर राससले प्रेषित गरेको छ ।
