नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले मिलेनियम च्यालेन्ज कर्पोरेसन (एमसीसी) लाई संसदबाट पारित नगराउन दबाव दिँदै व्यापक जनताको सहभागितामा देशव्यापी भण्डाफोर आन्दोलन गर्ने उदघोष गरेको छ ।
माघ १ देखि १५ सम्मका विभिन्न कार्यक्रमको तालिका सार्वजनिक गर्दै विप्लव नेकपाले एमसीसी सम्झौता सदनबाट पारित गरिए नेपाल बन्दलगायतका सङ्घर्ष विभिन्न कार्यक्रम अघि बढाइने जनाएको छ । बिहीबार सार्वजनिक आन्दोलनका कार्यक्रमअनुसार नेकपाले अमेरिकी दूतावास, संयुक्त राष्ट्रसङ्घको कार्यालय र नेपाल सरकारलाई ज्ञापनपनपत्र बुझाउने भएको छ ।
यस्तै, जनसङ्घर्षअन्तर्गत आस्थाका आधारमा बन्दी बनाइएका आफ्नो पार्टीका नेता–कार्यकर्ताहरूको तस्बिर प्रदर्शन गर्ने, महँगीविरुद्ध प्रदर्शन गर्ने र व्यापक जनसहभागितामा जनवादी सांस्कृतिक कार्यक्रम गर्ने सो पार्टीको घोषणा छ ।
घोषित कार्यक्रमअनुसार माघ ५ मा सरकारलाई ज्ञानपनपत्र बुझाउने, माघ १० मा अमेरिकी दूतावासमा ज्ञापनपनपत्र दिने, माघ १२ मा संयुक्त राष्ट्रसङ्घको कार्यालयमा ज्ञापनपनपत्र बुझाउने कार्यतालिका छ भने देशव्यापी जनसङ्घर्षका कार्यक्रमअन्तर्गत माघ १० मा बन्दीहरूको रिहाइका निम्ति तस्बिरसहित प्रदर्शन, माघ १६ मा सहिद दिवस मनाउने, माघ १८ मा महँगीविरुद्ध प्रदर्शन, माघ २० मा खुला सांस्कृतिक कार्यक्रम र माघ २५ मा देशव्यापी अन्तर्क्रिया गर्ने विप्लव नेकपाले जनाएको छ ।
