अफगानिस्तानको पूर्वी प्रान्त नान्गाहारमा सुरक्षा फौजले गरेको कारबाहीमा परी शनिबार बिहान १७ जना तालिवान मारिएका छन् ।
उक्त प्रान्तको हिसाराक जिल्लामा शुक्रबार पनि आतङ्ककारी विरुद्ध अफगान सुरक्षाबलको कारबाहीका क्रममा ३३ जना भन्दा बढी आतङ्ककारी मारिएको जनाइएको थियो ।
सो जिल्लाको आसपासमा शनिबार बिहान पनि सुरक्षा फौजले कारबाहीको प्रक्रिया निरन्तर गरेको बताइएको थियो । यस कारबाहीमा परी शनिबार बिहान १७ जना तालिवान लडाकू मारिएका जनाइएको हो ।
यस कारबाहीमा दर्जनौँ आतङ्ककारी घाइते भएका सुरक्षा अधिकारीहरुले जानकारी दिएका छन् । त्यस क्षेत्रमा विगतका केही दिनदेखि तालिवानका क्रियाकलापहरुमा बृद्धि भएको महसुश गरी कारबाहीलाई थप तिब्र पारिएको बताइएको छ ।
यस कारबाहीको विषयलाई लिएर तालिवान आतङ्ककारी समूहले भने कुनै टिप्पणी गरेका छैनन् । तालिवानाले बिहीबारमात्र पनि ठूलो सङ्ख्यामा प्रहरीको हत्या गरेका छन् ।
उनीहरुले पछिल्लो समयमा सर्वसाधारणमाथि क्रुर तरिकाबाट हमला गर्ने गरेका छन् । हमलामा परी कैयौंले ज्यान गुमाएका छन् । उता सुरक्षाकर्मीहरुले पनि उनीहरुका विरुद्धमा कारबाही जारी राखेका छन् । रासस/सिन्ह्वा
