अमेरिकाको डलासमा भएको एक प्रदर्शनका क्रममा चलाइएको गोली लागि पाँच प्रहरी अधिकृत मारिएका छन् । घटनामा अरु ६ जना घाइते भएका छन् ।
गत हप्ता अश्वेत नागरिकमाथि प्रहरीले गोली चलाएको विरोधमा भएको प्रदर्शनका क्रममा कसैले माथिबाट प्रहरीमाथि गोली हान्दा ती प्रहरी अधिकारीको मृत्यु भएको डालस प्रहरी प्रमुख डेभिड ब्राउनले जानकारी दिए ।
एम्बुस शैलीले प्रहरी अधिकारीहरुमाथि आक्रमण गरिएको डालस प्रहरी प्रमुख ब्राउनले जानकारी दिए । गोली प्रहार गरेको आशंकामा प्रहरीले तीन जनालाई पक्रेको छ भने एक जनाले आत्मसमर्पण गरेका छन् ।
यो हप्ता अमेरिकामा प्रहरीले चलाएको गोली लागि दुई अश्वेत नागरिक मारिएपछि रङका आधारमा प्रहरीले कालामाथि गोली चलाएको भन्दै विरोध प्रदर्शन भइरहेको छ ।
गत मंगलबार लुजियानामा प्रहरीको गोली लागि ३७ वर्षीय एन्डिल स्टेर्लिङ तथा बुधबार प्रहरीकै गोली लागेर ३२ वर्षीय फिलान्डो क्यास्टाइल मारिएका थिए ।
फिनाल्डोकी केटी साथीले उनलाई प्रहरीले गोली हानेको भिडियो खिचेकी थिइन् । जुन इन्टरनेटमा भाइरल बनेको छ । (एजेन्सी)
