महाेत्तरी । जिल्लाको सरपल्लो गाविसमा शनिबार साँझ खोलामा डुबेर १ बालिकाको मृत्यु भएको छ ।मृत्यु हुनेमा सरपल्लो गाविस– ७ बस्ने आलम नदाफकी ७ वर्षीया छोरी चाँदनी खातुन रहेको जिल्ला प्रहरी कार्यालयले जनाएको छ ।

अत्यधिक गर्मी भइरहेका बेला शनिबार साँझ ५ बजेतिर घरदेखि ५ सय मिटर दुरीमा रहेको रातो खोलामा साथीहरुसँग खेल्दै नुहाउन पुगेकी बालिका खातुनको सोही नदीमा डुबेर मृत्यु भएको प्रहरी उपरीक्षक जनक भट्टराईले बताए ।

बालिका खातुन खोलामा डुबेको निकै बेरपछि उनीसँगै गएका बालबालिकाले उनको खोजी गर्दा नभेटेपछि घरमा आएर उनका परिवारजनलाई भनेपछि उनको खोजतलास हुँदा साँझपख उनको शव खोलाकै पानीमा तैरिरहेको अवस्थामा फेला परेको थियो ।

शव परीक्षणका लागि शनिबार राति जिल्ला अस्पताल जलेश्वरमा ल्याइएको जिल्ला प्रहरी कार्यालय महोत्तरीले जनाएको छ ।

करेन्ट लागेर एकको मृत्यु, चार गम्भीर घाइते

तुलसीपुर (दाङ) । विद्युत्को पोल गाड्ने क्रममा शनिबार साँझ लालमटिया गाविस– ७ बराहखुटीमा करेन्ट लागेर गम्भीर घाइते भएका ५ मजदुरमध्ये १ को उपचारका क्रममा अाइतबार मृत्यु भएको छ ।

जिल्ला प्रहरी कार्यालय दाङका अनुसार मृत्यु हुनेमा लालमटिया गाविस– २ का २२ वर्षीय श्रीकृष्ण चौधरी रहेका छन् । करेन्ट लागेर गम्भीर घाइते चौधरीको उपचारका क्रममा लुम्बिनी अस्पतालमा मृत्यु भएको हो ।

गम्भीर घाइते भएका सोही ठाँउका १८ वर्षीय मनिराम चौधरी, १९ वर्षीय अशोक चौधरी, २३ वर्षीय सीताराम चौधरी र २३ वर्षीय प्रकाश चौधरीको लुम्बिनी अञ्चल अस्पताल, बुटवलमा उपचार भइरहेको छ ।

विद्युत् विस्तारको जिम्मा लिएका ठेकेदारले विद्युतसम्बन्धी जानकारी नै नभएका मजदुरलाई विद्युतीय काममा लगाउँदा उक्त दुर्घटना भएको दाङ प्रहरीले बताएको छ ।

आगलागीबाट १० लाख रूपैयाँ बराबरको क्षति