उत्तर कोरियाद्वारा गरिएको ब्यालिस्टिक क्षेप्यास्त्र परीक्षण विफल भएको छ । बिहीबार उत्तर कोरियाले दुई ब्यालिस्टिक क्षेप्यास्त्र परीक्षण गरे पनि दुबै असफल भएको दक्षिण कोरियाली र अमेरिकी अधिकारीहरुले जनाएका छन् ।
क्षेप्यास्त्र प्रक्षेपण गरेलगत्तै विस्फोट भएर नष्ट भएको बताइएको छ । ३ हजार किलोमिटर रेन्जको उक्त क्षेप्यास्त्र केही सेकेन्ड मै ध्वस्त भएको थियो ।
पूर्वी तटीय क्षेत्र वोनसन नजिकै स्थानीय समयअनुसार बिहान ६ः४० मा पहिलो क्षेप्यास्त्र प्रक्षेपण गरिएको थियो । दोस्रो परीक्षण ७ः२६ मा गरिएको थियो । दुबै परीक्षण विफल भएको बताइएको छ ।
उत्तर कोरियाले भने यसबारे कुनै प्रतिक्रिया जनाएको छैन । (एजेन्सी)
