मुलुकको दूरसञ्चार बजारमा देखिएको प्रतिस्पर्धात्मक वातावरणमा बजार हिस्सा अभिवृद्धि गर्नुका साथै सेवाको गुणस्तर सुदृढ गर्ने कार्यलाई प्राथमिकता दिन नेपाल टेलिकमले चालु आर्थिक वर्ष २०७४/७५ को वार्षिक कार्यक्रम सार्वजनिक गरेको छ ।
उपभोक्ता वर्गको अपेक्षा अनुरूप दूरसञ्चार सेवा प्रदान गर्ने कार्यलाई प्राथमिकता दिन चालु आ.व. मा विभिन्न कार्यक्रममार्फत टेलिकमले आफ्नो सेवा विस्तारतर्फ १७ प्रतिशत ग्राहक थप गर्ने लक्ष्य लिएको छ । कम्पनीको सेवा विस्तार तथा गुणस्तर सुदृढीकरणका लागि करिव २२ अर्ब पुँजीगत लगानी गर्ने योजना रहेको टेलिकमले जनाएको छ ।
१७ प्रतिशत ग्राहक थप गर्ने उद्देश्य अनुरूप टेलिकमले चालु आ.व. मा मुलुकभर गुणस्तरीय जीएसएम सेवा उपलब्ध गराउने लक्ष्यसहित एक वर्षभित्र १ करोड जीएसएम प्रोजेक्ट अन्तर्गतका कार्य सम्पन्न गर्ने भएको छ । सो सेवाबाट मुलुकका अति विकट तथा दुर्गम स्थानमा समेत जीएसएम सेवा विस्तार हुने टेलिकमकी प्रबन्ध निर्देशक कामिनी राजभण्डारीले जानकारी दिइन् ।
हालसम्म पुरानो प्रविधिमा आधारित ल्यान्डलाइन सेवाबाट सञ्चालित आधारभूत टेलिकम सेवा (पीएसटीएन) मध्ये काठमाडौंमा १४ वटा तथा काठमाडौं बाहिरका क्षेत्रमा १५ वटा एक्स्चेन्जमा जम्मा ३९ हजार ३ सय ३६ लाइनलाई नयाँ प्रविधिमा प्रतिस्थापन गरी केही समयभित्रै कूल एक लाख ३४ हजार लाइन क्रमिक रूपमा प्रतिस्थापन गर्दै लैजाने टेलिकमले जनाएको छ ।
टेलिकमले चालु आ.व. मा इन्टरनेट सेवाको माग बढ्दै गएकाले आगामी दिनमा डाटा सेवाको विस्तार गर्न वायरलाइन तथा मोबाइल डाटा सेवालाई अझ बढी सुविधा र सहजताका लागि ग्राहक माझ प्रस्तुत गर्ने भएको छ । “ग्राहकको चाहना अनुरूप नयाँ–नयाँ डाटा प्याकेज बजारमा ल्याई डाटा सेवाबाट कम्पनीको आम्दानी बढाउन पहल हुनेछ,” राजभण्डारीले भने– “मोबाइल डाटा सेवातर्फ विभिन्न सेवा सुरु भइसकेको र भविष्यमा अन्य सेवा समेत सुरु गर्नुका साथै मोबाइल वित्तीय सेवा यथाशीघ्र सुरु गर्न गृहकार्य भइरहेको छ ।”
दूरसञ्चार पूर्वाधार निर्माणतर्फ भने ग्रामीण दूरसञ्चार कोषमार्फत पहाडी जिल्लामा अप्टिकल फाइबर परियोजना कार्यान्वयनका क्रममा रहेको छ । टेलिकमले वीर अस्पताल, त्रिवि शिक्षण अस्पतालमा फ्री वाइफाई सञ्चालन गरेको छ । सबै सेवामा ग्राहकको गुनासो, इन्क्वारी, जानकारीलाई एकीकृत गरी छिटो तथा सरलरूपमा सेवा प्रदान गर्न अत्याधुनिक ग्राहक सम्पर्क कक्ष सञ्चालनलाई विस्तारित र प्रभावकारी बनाउने टेलिकमको योजना छ ।
आगामी ६ महिनाभित्रमा देशभरि दूरसञ्चारको सम्पूर्ण सेवालाई एकद्वारमुखी ग्राहक सेवा प्रणाली ग्राहक सम्बन्ध व्यवस्थापन मार्फत प्रदान गरिने राजभण्डारीको भनाइ छ । चालु आ.व. मा टेलिकमको आम्दानी ४४ अर्ब रूपैयाँभन्दा बढी हुने अनुमान गरिएको छ भने करपछिको मुनाफा १५ अर्ब रूपैयाँभन्दा बढी हुने अपेक्षा गरिएको छ ।
२०७४ जेठ मसान्तसम्ममा कम्पनीको टेलिफोन ग्राहक आधार १ करोड ७४ लाख ४२ हजार ९ सय २२ रहेको छ । इन्टरनेट ग्राहक आधार २०७४ जेठसम्ममा ८३ लाख ९५ हजार पुगेको छ ।
आ.व. २०७३/७४ मा कम्पनीको भ्वाइस सेवाका ग्राहक आधार १७ प्रतिशत वृद्धि भई टेलिघनत्व ६२ प्रतिशत पुगेको छ । डाटा सेवाका ग्राहक ११ प्रतिशतले वृद्धि भई डाटा घनत्व करिव ३० प्रतिशत पुगेको छ । टेलिकमले पछिल्लो पटक देशका विभिन्न स्थानमा बाढी पहिरोबाट पीडित भएकाको उद्धार तथा राहत कार्यमा आवश्यक सहयोग पुर्याउनका लागि आइतबारदेखि मंगलबारसम्म आफ्नो नेटवर्कभित्र निःशुल्क एसएमएस सेवा समेत उपलब्ध गराउने भएको छ ।
