बहुक्षेत्रीय प्राविधिक तथा आर्थिक सहयोगका लागि बङ्गालको खाडीका देशहरुको प्रयास (बिम्स्टेक) को चौथो शिखर सम्मेलनका लागि नेपाल आएका छ वटै मुलुकका ‘विशिष्ट पाहुनाहरु’ ले राष्ट्रपति विद्यादेवी भण्डारीसँग संयुक्त भेटवार्ता गरेका छन् ।
भेटवार्ताका लागि उनीहरु बिहीबार दिउँसो शीतलनिवासस्थित राष्ट्रपतिभवन पुगे । राष्ट्रपतिका सल्लाहकार सुशील प्याकुरेल, राष्ट्रपति कार्यालयका सचिव विनोद केसीलगायतले राष्ट्रपति कार्यालयमा उनीहरुलाई स्वागत गरे ।
बिहीबारै शुरु हुने शिखर सम्मेलनपूर्व राष्ट्रपति भण्डारीले उनीहरुको सम्मानमा दिवाभोजको आयोजना गरेकी छन् । प्रधानमन्त्री केपी शर्मा ओलीलगायतका उच्चपदस्थ अधिकारीहरु समेत दिवाभोजमा सहभागी भए ।
बिम्स्टेकमा नेपालसहित सात राष्ट्र सदस्य छन् । सम्मेलनमा भाग लिन सबै सदस्य मुलुकका राष्ट्राध्यक्ष तथा सरकार प्रमुख नेपाल आइपुगेको सरकारी समाचार एजेन्सी राससले जनाएको छ ।
फोटो फिचरका लागि तलको लिंकमा क्लिक गर्नुहोस्–
राष्ट्रपति भण्डारीका ‘बिम्स्टेक अतिथि’ हरु ! (तस्बिर)
