आइतबार धितोपत्र बजारमा उच्च अङ्कले शेयरको मूल्यमा ह्रास आएको छ ।
नेपाल स्टक एक्सचेञ्जका अनुसार कारोबार मापक नेप्से परिसूचक १४ दशमलव ८२ अङ्कले घटेर १ हजार १ सय ६६ दशमलव ४३ विन्दुमा पुगेको छ । प्रतिशतका आधारमा आइतबार शेयर बजार १ दशमलव २५ विन्दुले घटेको छ ।
‘क’ वर्गका कम्पनीको कारोबार मापन गर्ने सेन्सेटिभ परिसूचक समेत ३ दशमलव ०८ विन्दुले घटेर २ सय ४७ दशमलव ९८ विन्दुमा झरेको छ । स्टकका अनुसार कूल १ सय ५४ कम्पनीको ८ लाख ४० हजार ५५ कित्ता शेयर २५ करोड ६ लाख ४२ हजार ४ सय ७५ रूपैयाँमा खरिद–बिक्री भएका छन् ।
कारोबार भएका कूल १० उपसमूहमध्ये आइतबार सबै उपसमूहको शेयर मूल्य घटेको छ । बैंकिङ १२ दशमलव ६४, होटल २८ दशमलव ८७, विकास बैंक ६ दशमलव ४७, जलविद्युत् २४ दशमलव ८९, वित्त ५ दशमलव १६, निर्जीवन बीमा ९६ दशमलव ७६, उत्पादन ५० दशमलव ५४, अन्य ७ दशमलव ७१, माइक्रोफाइनान्स २२ दशमलव ४५ र जीवन बीमा ४४ दशमलव ४० अङ्कले घटेको राससले जनाएको छ ।
