स्रोत नखुलेको भनी राष्ट्र बैंकले रोक्का राखिदिएको व्यापारी अजेयराज सुमार्गीको मुक्तिश्री सिमेन्ट उद्योगमा आएको वैदेशिक लगानी रकम सर्वोच्च अदालतले खोलिदिएको छ ।
उक्त रकम नरोक्न भन्दै सर्वोच्चले सरकारका नाममा अन्तरिम आदेश जारी गरेको हो । न्यायाधीश दीपकराज जोशीको मंगलबारको एकल इजलासले ‘सुविधा र सन्तुलन’ को कारण देखाई पुस २४ सम्म खाता सञ्चालनमा अवरोध नगर्न भनेको हो ।
सर्वोच्चको यो आदेशपछि सुमार्गीको करिव ८४ करोड (७.५ मिलियन अमेरिकी डलर) रकम फुकुवा भएको छ । उद्योगको खातामा रहेको रकम उसको आवश्यकता र समयतालिका बमोजिम माग गरेका बखत भुक्तानी दिनू, दिलाउनू र सोसम्बन्धी खाता सञ्चालनमा अर्को आदेश नभएसम्म कुनै अवरोध नगर्नु, नगराउनू’– आदेशमा भनिएको खबर शुक्रबारको कान्तिपुर दैनिकमा प्रकाशित छ ।
